Եվրահանձնաժողովը դեռ պատրաստ չէ Թուրքիայի քաղաքացիների նկատմամբ մուտքի արտոնագրերի պահանջները չեղարկելու հանձնարարական տալ, սակայն գնահատում է եվրաինտեգրման ճանապարհին երկրի կատարած քայլերը, հայտնում է «Ռոսբալտը»:
Աղբյուրի տեղեկություններով՝ Եվրահանձնաժողովը իշխանություններին կոչ է արել մի շարք օրենսդրական ու վարչական բարեփոխումներ իրականացնել:
Աղբյուրը նշում է, որ այսօր՝ հոկտեմբերի 20-ին Եվրահանձնաժողովը ԵԽ-ին եւ ԵՄ-ի խորհրդին է ներկայացրել Թուրքիայի կողմից առանց մուտքի արտոնագրի ռեժիմի առաջխաղացման գործում հաստատված չափանիշների իրականացման առաջին գանհատականները: Եվրահանձնաժողովի ճանապարհային քարտեզը բաղկացած է 5 մասերից. միգրացիոն գործընթացների կառավարում, փաստաթղթերի պաշտպանություն, հասարակական կարգ եւ անվտանգություն, հիմնարար իրավունքներ, ինչպես նաեւ ապօրինի միգրանտների հետընդունում:
Ինչպես նշվում է զեկույցում, օրենսդրական եւ վարչական ոլորտների իրավիճակն ու ԵՄ-ի հետ ընդհանուր համագործակցությունը դեռեւս չեն հասել այն մակարդակին, որով Եվրահանձնաժողովը կարող է ԵԽ-ին ու ԵՄ-ի խորհրդին առաջարկել Թուրքիայի քաղաքացիների նկատմամբ վիզային պահանջները չեղյալ հայտարարել:
Եվրահանձնաժողովը նաեւ Անկարային կոչ է անում սահմանների կառավարման առավել արդյունավետ համակարգ ստեղծել:
Աղբյուրը հիշեցնում է, որ 2013թ. դեկտեմբերի 16-ին Թուրքիան Եվրամիության հետ ռեադմիսիայի համաձայնություն էր ստորագրել: Պայմանագրի ստորագրումը առաջին քայլն էր Թուրքիայի եւ ԵՄ-ի միջեւ մուտքի արտոնագրերի չեղարկման ճանապարհին: