Ազգային ժողովի »Բարգավաճ Հայաստան» խմբակցության պատգամավոր, ԲՀԿ առաջնորդ Գագիկ Ծառուկյանի խնամի Մուրադ Գուլոյանը մասնակցելու է հոկտեմբերի 24-ին Ազատության հրապարակում կայանալիք եռյակի հանրահավաքին: Այս մասին NEWS.am-ի թղթակցի հետ զրույցում ասաց Մուրադ Գուլոյանը:
Նա նշեց, որ մասնակցել է նաեւ հոկտեմբերի 10-ի հանրահավաքին: Գագիկ Ծառուկյանի խնամին լավ չընդունեց հանրահավաքին իր մասնակցության մասին հարցը: «Չի սազում էդ հարցերը, որ ինձ եք տալիս»,-ասաց նա: Դիտարկմանը, թե նորմալ հարց է, ինչ խնդիր կա, պատգամավորն այսպես հակադարձեց՝ «հեչ նորմալ հարց չի, դա կարաք ոչ ինձ հարցնեք»՝ ակնարկելով, թե իր դեպքում հստակ է, որ մասնակցելու է:
Մյուս «ոչ նորմալ» հարցը՝ իշխանափոխության կոչերին միանալու մասով, Ծառուկյանի խնամուն հանեց հունից, «արդեն շատ եք հարցեր տալիս» ասաց նա ու անջատեց հեռախոսը:
