Խորհրդարանական եռյակի հանրահավաքին կառաջարկենք երկրի ներկայիս ճգնաժամից դուրս գալու ուղին: Այդ մասին այսօր՝ հոկտեմբերի 21-ին, խորհրդարանում հայտարարեց Հայ ազգային կոնգրես խմբակցության քարտուղար Արամ Մանուկյանը: Նրա խոսքով՝ եթե հոկտեմբերի 10-ի հանրահավաքին ՀԱԿ-ը, ԲՀԿ-ն ու «Ժառանգությունը» իշխանության ճգնաժամն իր անունով կոչեցին, ապա հոկտեմբերի 24-ին կառաջարկվեն նաեւ դրա հաղթահարման եղանակները:
Մանուկյանը հավելեց, որ վերջին 4 տարվա ընթացքում մոտ 213 հազար մարդ է լքել երկիրը: «Ինտեգրացիոն քաղաքականության տապալման հետեւանքով տուժեց երկրի միջազգային հեղինակությունը, խորանում է Հայաստանի եւ Լեռնային Ղարաբաղի մեկուսացումը: Իշխանությունը նույնիսկ ընդունակ չեղավ իրագործել 12 առաջնահերթ գործողությունները, որոնք պահանջում էր ընդդիմությունը: Այսպիսով, Հայաստանում առկա է իշխանության ճգնաժամ», - նշեց Մանուկյանը:
