Փասադենայում Վարդերի շքերթի ամերիկահայկական միավորումը միջոցներ հավաքելու միջոցառում է անցկացրել հայտնի քալիֆորնիական Վարդերի շքերթին մասնակցելու համար, որը տեղի կունենա 2015թ.-ի հունվարի 1-ին արդեն 126-րդ անգամ: Միջոցառման ընթացքում հարգանքի տուրք են մատուցել այն 7 ամերիկահայերին որոնք առաջինն են մասնակցել շքերթին:
Ինչպես գրում է «The Pasadena Star-News» թերթը, ամերիկահայկական միավորումը, որն առաջին անգամ կմասնակցի 126-րդ Վարդերի շքերթին, հայատարարել է մի քանի հայ մասնակիցների անունները: «Մեր 7000-ամյա պատմությունն աշխարհի հետ Վարդերի շքերթի միջոցով կիսելը ֆենոմենալ է»,- ասել է լրագրող ու հեռուստահաղորդավար Ջիլ Սիմոնյանը:
Հարթակ բարձրացողների թվում են բասկետբոլի ամենահաջող մարզիչներից Ջերի Թարքանյանը, ԱՄՆ-ի դաշնային դատավոր Սեմյուել Տեր-Եղինյանը եւ Քալիֆորնիայի նախկին նահանգապետ Ջորջ Դոքմեջյան Կրտսերը: Անիվների վրա շքերթի հարթակն այնպես է կազմվելու, որպեսզի ներկայացնի հայկական մշակույթն ու հայերի ներդրումն աշխարհում, այդ թվում նաեւ ԱՄՆ-ում:
Նշենք, որ Վարդերի շքերթը խոշորագույնն է, որն անցկացվում է ամերիկյան Քալիֆորնիա նահանգում: Շքերթն իրենից ներկայացնում է նաեւ ծաղիկների փառատոն, որն ամեն տարի անցկացվում է հունվարի 1-ին, դրան մասնակցում է ավելի քան մեկ միլիոն մարդ, իրադարձությունը հեռարձակվում է ուղիղ եթերում:
