Նորքի ինֆեկցիոն հիվանդանոցից փախուստի դիմած եւ այժմ Վրաստանում գտնվող Սուրեն Վաչիկի Գաբրիելյանի առողջական վիճակը շարունակում է մնալ ծանր, առաջիկայում նախատեսվում է եսւ մեկ վիրահատություն՝ կապված սրտի հետ: Այս մասին NEWS.am-ի թղթակցի հետ զրույցում ասաց նրա փաստաբանը՝ Հակոբ Ճարոյանը, ով երեկ է վերադարձել Վրաստանից:
Նա գնացել էր, որպեսզի իր պաշտպանյալի հետ կապված բոլոր փաստաթղթերը հանձնի նրա վրացի պաշտպանին: Հակոբ Ճարոյանն ասաց, որ այժմ քննարկում են նոր միջնորդություններ ներկայացնելու հարցը: Մասնավորապես, նրանք ցանկանում են Վրաստանում եւս անցկացնել դատաբժշկական փորձաքննություն, որպեսզի համոզվեն, որ նրա առողջական վիճակը ծանր է եւ խափանման միջոցը փոխեն:
Ի դեպ, այս գործով նոր հետաքրքիր հանգամանքներ են ի հայտ եկել, որոնք կներկայացնենք առաջիկայում:
Նշենք, որ Սուրեն Գաբրիելյանի մասով դատական նիստը Վրաստանում կայանալու է նոյեմբերի 20-ին: Հայաստանի դատախազությունը միջնորդություն է ներկայացրել վրաց իրավապահներին, որպեսզի նրան արտահանձնեն:
Ավելի վաղ NEWS.am-ը հայտնել էր, թե Նորքի ինֆեկցիոն հիվանդանոցից փախուստի դիմած Սուրեն Վաչիկի Գաբրիելյանի դեմ քրեական գործ է հարուցվել «Օրինաց երկիր» կուսակցության ղեկավար, այն ժամանակվա Ազգային անվտանգության խորհրդի քարտուղար Արթուր Բաղդասարյանի գրության հիման վրա: Այս մասին NEWS.am-ի թղթակցի հետ զրույցում ասել էր նրա փաստաբանը՝ Հակոբ Ճարոյանը:
Նա նշել էր, որ Արթուր Բաղդասարյանը գրություն էր ներկայացրել՝ նշելով, թե դա ստացել է ՀՀ-ում Իրանի Իսլամական Հանրապետության դեսպանատնից, եւ այդ գրության հիման վրա սկսվել էր հետաքննություն, հարուցվել քրեական գործ, որի շրջանակներում էլ կալանավորվել էր Սուրեն Գաբրիելյանը: Փաստաբանը մտադիր է հենց առաջին դատական նիստին միջնորդություն ներկայացնել եւ Արթուր Բաղդասարյանին դատարան կանչել հարցաքննության: ՕԵԿ մամուլի խոսնակ Արթուր Միսակյանը մեզ հետ զրույցում ասել էր, թե Արթուր Բաղդասարյանը որեւէ նման գրություն չի ուղարկել եւ ընդհանրապես այդ գործի հետ կապ չունի:
