Եվրասիական տնտեսական միության դեմ ջղաձգվողները մեկ-երկու տասնյակ չեն, հազարավոր են: Այսօր` հոկտեմբերի 22-ին, լրագրողների հետ զրույցում այսպիսի կարծիք հայտնեց ԱԺ «Ժառանգություն» խմբակցության պատգամավոր Թեւան Պողոսյանը` պատասխանելով հարցին, թե Հայաստանի առաջին նախագահ Լեւոն Տեր-Պետրոսյանը ԵՏՄ-ին դեմ հանդես եկողներին «ջղաձգվողներ» ասելով ում նկատի ուներ:
«Ճիշտ չէ, որ ես մեկնաբանեմ Լեւոն Տեր-Պետրոսյանի խոսքերը, սակայն չեմ կարծում, որ ԵՏՄ-ի դեմ խոսողներն այդքան քիչ են: Ամեն դեպքում եռյակում արտաքին քաղաքականության հարցերը չեն քննարկվում: Ամեն մարդ իր կարծիքն ունի, ապագան էլ ցույց կտա, թե ով է ավելի ճիշտ: Անձամբ ինքս ԵՏՄ-ին չեմ հավատում եւ հույս չունեմ, որ այդ կառույցը կկայանա ու ապագա կունենա»,- ասաց ընդդիմադիր պատգամավորը:
Նշենք, որ հոկտեմբերի 10-ին եռյակի համատեղ համապետական հանրահավաքին ՀԱԿ առաջնորդը մասնավորապես ասել էր. «Հայաստանի անդամակցումը Եվրասիական միությանը այլեւս անշրջելի իրողություն է (1.03.2014)։ Իսկ այդ առթիվ երկու-երեք տասնյակ անհատների ջղաձգումներն արդեն վերածվում են զավեշտի, քանի որ երկու-երեք տասնյակ հոգի, մարդկանց մտքերը պղտորելուց բացի, ոչ մի պարագայում չեն կարող քաղաքական օրակարգ թելադրել»: