Երեւանի քաղաքապետարանի աջակցությամբ եւ Երեւանի Առեւտրաարդյունաբերական պալատի, Կուրգանի, Օմսկի ու Նիժնի Նովգորոդի արտահանման տարածաշրջանային աջակցության կենտրոնների նախաձեռնությամբ անցկացվել է Հայ-ռուսական գործարար համաժողով: Հանդիպումը կազմակերպվել է «Ռուսաստանի ձեռնարկությունների բիզնես առաքելությունը Երեւան քաղաքում» նախագծի շրջանակում: Համաժողովի նպատակն է աջակցել երկու երկրների ու մասնավորապես Երեւանում գործարարների անմիջական փոխադարձ արդյունավետ եւ առեւտրային համագործակցության հաստատմանն ու ընդլայնմանը:
Երեւանի քաղաքապետի անունից ողջունելով ծրագրի մասնակիցներին՝ քաղաքապետարանի աշխատակազմի զարգացման եւ ներդրումային ծրագրերի վարչության պետ Արմեն Հարությունյանն ընդգծել է քաղաքապետարանի պատրաստակամությունը՝ աջակցելու Երեւանում գործարար միջավայրի զարգացմանը, նաեւ համոզմունք հայտնել, որ համաժողովի անցկացումը համագործակցության զարգացման հնարավորությունների կարեւոր հարթակ է:
Հայ-ռուսական գործարար համաժողովին մասնակցել են Ռուսաստանի Դաշնության 9 խոշոր ընկերություններ, որոնք զբաղվում են ջեռուցման համակարգերի, ճանապարհաշինական տեխնիկայի, ինչպես նաեւ երեւանյան ընկերությունների համար առաջնային առավել հետաքրքրություն ներկայացնող մի շարք այլ ոլորտների ձեռնարկությունների ներկայացուցիչներ:
Համագործակցության մանրամասները քննարկելու եւ փորձի փոխանակում կատարելու նպատակով ծրագրի շրջանակում կկազմակերպվեն գործնական հանդիպումներ եւ փոխայցելություններ:
