Ինդոնեզիայի նոր նախագահ Ջոկո Վիդոդոն խնդրել է իրեն դիմել Ջոկովի մականունով, որով կահույքի գնորդ մի ֆրանսիացի էր նրան կոչել, հայտնում է Associated Press-ը:
Հոկտեմբերի 19-ին երդում տված Վիդոդոն շատերին հայտնի է Ջոկովի մականունով, որը նրա անվան եւ ազգանվան կրճատ տարբերակն է:
Պատասխանելով լրագրողների հարցին, թե ինչպես դիմեն իրեն, նախագահն ասել է. «Անհարմար է Ջոկո ասելը, եւ պարոն Վիդոդո կամ նախագահ Վիդոդո էլ տարօրինակ է հնչում»: Նա հավելել է, որ պաշտոնական դիմելաձեւին հակված լրագրողները կարող են իրեն անվանել «նախագահ Ջոկովի»:
Տեղի մամուլը պարզել է, որ նախագահը Ջոկովի մականունն ստացել է դեռ 2005թ., երբ զբաղվել է կահույքի առեւտրով: Մականունն իրեն տվել է ազգությամբ ֆրանսիացի մի գնորդ:
Աղբյուրը նշում է, որ երկրի նախկին նախագահ Սուսիլո Բամբանգու Յոդոյոնոյին էլ Ինդոնեզիայում դիմում էին կրճատ՝ SBY (Susilo Bambang Yudhoyono) տարբերակով: