Ադրբեջանը հրաժարվում է մասնակցել Երեւանում նախանշված «Եվրանեսթ»-ի լիագումար նիստին: Այս մասին Trend գործակալությանը հայտարարել է ադրբեջանական պատվիրակության ղեկավար Էլհան Սուլեյմանովը:
Ավանդույթի համաձայն, ադրբեջանցի խորհրդարանականը նիստին մասնակցությունից հրաժարվելը պայմանավորել է ղարաբաղյան չլուծված հակամարտությամբ: Միաժամանակ, ադրբեջանական կողմը բողոք է հայտնել Հայաստանի համանախագահության դեմ:
Հիշեցնենք, որ Հայաստանի Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը հոկտեմբերի 22-ի նիստի ժամանակ հայտարարեց, որ «Եվրանեսթ»-ի Խորհրդարանական վեհաժողովի 4-րդ լիագումար նիստն անցկացվելու է Երեւանում, 2015 թվականի մարտի 16-20-ը: Նա նշեց, որ մեր երկրի խորհրդարանը դեռեւս 2013 թվականին առաջարկել էր «Եվրանեսթ»-ի Խորհրդարանական վեհաժողովի նստաշրջանը 2014թ. Հայաստանում անցկացնել: Սակայն, նրա խոսքով, Հայաստանի առաջարկը հետաձգվել է մինչեւ 2015 թվականը: