Սպորտի եւ երիտասարդության հարցերի նախարար Գաբրիել Ղազարյանի մամուլի խոսնակ Աստղիկ Մարտիրոսյանը հերքում է մամուլի տեղեկություններն այն մասին, թե նախարարը խորհրդարանական ոչ իշխանական եռյակի՝ ԲՀԿ-ի, ՀԱԿ-ի եւ «Ժառանգության» կազմակերպած հանրահավաքին 3000-ից ավելի մարզիկների եւ ծնողների է ստիպողաբար տարել Ազատության հրապարակ:

«Լուրը համարում եմ ստահոդ, ենթադրությունների մակարդակի եւ նման լուրեր չեմ ցանկանում մեկնաբանել: Նախարարն այս պահին աշխատում է իր բնականոն հունով»,- NEWS.am-ին ասաց Աստղիկ Մարտիրոսյանը:

Նշենք, որ «Ժամանակ» թերթը մասնավորապես գրել էր. «Սպորտի նախարարության ենթակա բոլոր 23 մարզադպրոցներից, որոնք սնվում են պետբյուջեից, 3 հազարից ավելի մարզիկների, նրանց ծնողներին, մարզիչների պարտադրաբար տարել են Ազատության հրապարակ՝ ընդդիմադիր կամ ոչ իշխանական եռյակի հոկտեմբերի 10-ի հանրահավաքին մասնակցելու համար: Մեր տեղեկություններով՝ սպորտի նախարար Գաբրիել Ղազարյանը նույն ծրագիրն իրականացնելու է նաեւ հոկտեմբերի 24-ին: Սերժ Սարգսյանը շուտով պաշտոնանկ է անելու սպորտի նախարար Գ. Ղազարյանին»։