Ես մտադիր չեմ բացահայտել վաղվա հանրահավաքի հետ կապված բոլոր գաղտնիքները, իրադարձությունների զարգացումը ձեզ կհուշի վաղվա օրակարգը: Այդ մասին այսօր՝ հոկտեմբերի 23-ին, լրագրողներին հայտարարեց «Բարգավաճ Հայաստան» խմբակցության պատգամավոր Միքայել Մելքումյանը՝ պատասխանելով հարցին՝ խորհրդարանական եռյակի վաղվա հանրահավաքին արդյոք անակնկալներ սպասվո՞ւմ են:
«Վաղը կներկայացվի գործողությունների ծրագիրը, ելույթ կունենա Գագիկ Ծառուկյանը եւ ամեն ինչ պարզ կդառնա», - հավաստիացրեց Մելքումյանը՝ հավելելով, որ դեռեւս հայտնի չէ հաջորդ հանրահավաքի ամսաթիվը, խորհրդարանական եռյակն այդ հարցը դեռ չի քննարկել:
Ինչ վերաբերում է իշխանությունների հետ բանակցություններ վարելու հարցին, եթե Ազատության հրապարակում հավաքվի ժողովրդի հոծ զանգված, ապա Մելքումյանի խոսքով՝ բանակցություններ վարելու համար պարտադիր չէ հոծ զանգավածի առկայությունը. «Իշխանությունների հետ բանակցություններ վարելու հնարավորությունը պայմանավորված կլինի մի շարք գործոններով: Իհարկե, կարեւոր է՝ քանի մարդ կհավաքվի՝ 5000, թե՞ 50 հազար: Տվյալ պահին խորհրդարանական եռյակը իշխանությունների հետ բանակցություններ չի վարում: Մենք պետք է պատշաճ բանակցություններ վարենք իշխանափոխության եւ կառուցվածքային փոփոխությունների հասնելու համար»: Նա նաեւ նշել է, որ պատկերացում չունի լրատվամիջոցներում շրջանառվող լուրերի մասին, որ եռյակը մարդկանց մարզերից տաքսիներով է բերելու:
Հիշեցնենք, որ վաղը՝ հոկտեմբերի 24-ին, Ազատության հրապարակում տեղի կունենա խորհրդարանական եռյակի (ԲՀԿ, ՀԱԿ, «Ժառանգություն») համատեղ հանրահավաքը:
