Իշխող կուսակցությունը խուճապի է մատնվել խորհրդարանական արտահերթ նիստեր հրավիրելու ընդդիմության ստացած հնարավորության պատճառով, եւ դա կանխելու համար սկսել է ԱԺ բերել կառավարության ներայացրած անհետաձգելի քննարկման ենթակա օրինագծերը։ Այս մասին այսօր՝ հոկտեմբերի 23-ին, ԱԺ-ում հայտարարեց ՀԱԿ խմբակցության ղեկավար Լեւոն Զուրաբյանը՝ որպես օրինակ, մատնանշելով «Սահմանամերձ գյուղական համայնքներում իրականացվող գործունեությունը հարկերից ազատելու մասին» կառավարության նախագիծը։
Զուրաբյանի խոսքով՝ ՀՀԿ-ն այնքան է շտապել այս օրինագիծը ԱԺ քննարկման ներկայացնելու հարցում, որ նախագծերի փաթեթը խախտումներով է ներկայացրել. ԱԺ կանոնակարգի համաձայն՝ առաջադրվող օրենքի նախագծի հետ այլ օրենքներում անհրաժեշտ փոփոխությունների նախագծեր ներկայացնելու փոխարեն կառավարությունը ԱԺ է բերել օրենքի այդ նախագծի հետ որեւէ կապ չունեցող նախագծեր։
«Դուք բերել եք օրինագծեր, որոնք ոչ մի կապ չունեն սահմանամերձ շրջաններին արտոնություններ տալու օրինագծի հետ եւ վերաբերում են ամբողջ Հայաստանում, ֆինանսական, հարկային օրենքներին»,- ասաց Զուրաբյանը՝ նշելով, որ դրանով իշխող կուսակցությունը խախտել է Պաշտպանության նախարարի, ապ ԱԺ նախագահ Գալուստ Սահակյանի հետ հանդիպմանը վեց խմբակցությունների միջեւ ձեռք բերված պայմանավորվածությունը։
Անհետաձգելի քննարկման ենթական՝ սահմանամերձ տարածքների արտոնությունների մասին օրինագիծը, ըստ Զուրաբյանի, նպատակ ուներ կանխել կառավարման ճգնաժամի վերաբերյալ ընդդիմության նախաձեռնած արտահերթ քննարկումը հոկտեմբերի 24-ին կայանալիք եռյակի հանրահավաքից առաջ։
«Դուք կցեցիք բոլոր այս օրինագծերը, որ խափանեք մեզ: Ու մեկ էլ պարզվում է՝ ինչ-որ ֆանտաստիկ ակտիվություն է ցուցաբերում մեծամասնությունը: Մենք էլ ձեզ մոտ ունենք լրտեսներ, գիտենք՝ ոնց եք հարցեր կազմել ու ով ինչ է ասել»,- ասաց Զուրաբյանը։
ԱԺ փոխնախագահ Էդուարդ Շարմազանովը չկարողացավ անտարբեր մնալ լրտեսների մասին Զուրաբյանի հայտարարությանը եւ կոչ արեց հարգանքով խոսել գործընկերների մասին։
«Այստեղ լրտեսներ չկան, պարոն Զուրաբյան։ Եթե դուք շատ եք շփվել լրտեսների հետ, դա ձեր խնդիրն է: Լրտեսներ փնտրեք ձեր շրջապատում: Իսկ ինչ վերաբերում է վախերին, հա, վախեցած ենք, չի՞ երեւում մեր դեմքերից՝ ինչքան վախեցած ենք»,- ասաց Շարմազանովը։
