Հոկտեմբերի 23-ին ՀՀ ՊՆ վարչական համալիրում անցկացվել է 2-րդ բանակային զորամիավորման կողմից իրականացված աշխատանքների կատարողականին նվիրված խորհրդակցություն, որի ընթացքում ներկայացվել են հաշվետու ժամանակահատվածում անցկացված միջոցառումներն ու շտկման կարիք ունեցող բացթողումները: Նիստը ղեկավարել է պաշտպանության նախարար Սեյրան Օհանյանը:
Բանակային զորամիավորման հրամանատարի հաշվետվության լսումներին ներկա էին նաեւ ՀՀ զինված ուժերի գլխավոր շտաբի պետ, գեներալ-գնդապետ Յուրի Խաչատուրովը, պաշտպանության նախարարի եւ գլխավոր շտաբի պետի տեղակալներ, վարչությունների եւ առանձին բաժինների պետեր, զորամասերի հրամանատարներ եւ այլք։
Ողջունելով ներկաներին` պաշտպանության նախարար Սեյրան Օհանյանը կարեւորել է նմանաբնույթ հաշվետվությունները, քանի որ միայն անցած ուղու վերանայման եւ համակողմանի վերլուծության դեպքում կարելի է բացառել նախկինում թույլ տրված բացթողումները, ճշգրտել հետագա անելիքները, ուրվագծել առաջիկա աշխատանքային ուղղությունները:
Ներկայացնելով զորամիավորման գործունեության արդյունքները` բանակային զորամիավորման հրամանատար, գեներալ-մայոր Պողոս Պողոսյանը փաստել է, որ հաշվետու ժամանակահատվածում իրականացվել են զորամիավորմանը ենթակա զորամասերի մարտական պատրաստականության բարձրացմանը միտված մի շարք պլանային եւ արտապլանային միջոցառումներ, ԶՈՒ պատրաստության պլանի համաձայն իրականացվել են նախատեսված բոլոր միջոցառումները« ճամբարային հավաքներն ու դաշտային ելքերը: Այդ ամենից զատ` հանկարծակի ստուգումների միջոցով պարբերաբար ստուգվել է զորամասերի եւ ենթակա զինանձնակազմի պատրաստականությունը: Ամփոփելով զեկույցը՝ Պողոս Պողոսյանն անդրադարձել է նաեւ պաշտպանության նախարարի եւ ԶՈւ ԳՇ պետի հանձնարարականների ուղղությամբ իրականացված աշխատանքներին:
Խորհրդակցության ավարտին Սեյրան Օհանյանը մատնանշել է շտկման կարիք ունեցող խնդիրներն ու աշխատանքային հիմնական ուղղությունները: