Թուրքիայի Եվրոպական Միություն մուտք գործելու գործընթացը տարիներով ձգձվում է: Այդ մասին հինգշաբթի պաշտոնական այցով Լատվիայում գտնվող Թուրքիայի նախագահ Թայիփ Էրդողանը հայտնել է լրագրողներին՝ իր լատվիացի գործընկեր Անդրիս Բերզինշի հետ հանդիպման արդյունքների հիման վրա:
Նրա խոսքով՝ Եվրոպական միությանը Թուրքիայի անդամակցելու սպասումն ու բանակցությունները շարունակվում է մոտ 50 տարի: «Կարծում եմ, Թուրքիայի անդամակցությունը ԵՄ համար պետք է ռազմավարական լուծում լինի: Թուրքիան ԵՄ ձգտում է ոչ թե իր բարեկեցությունը բարելավելու համար, այլ նրա համար, որպեսզի միանա գլոբալ արժեքներին, որոնք ներկայացնում է ԵՄ-ն»,- նշել է նա:
«Այդ տարիների ընթացքում մենք զգացել ենք շատ երկրների աջակացությունը, այդ թվում նաեւ Լատվիայի, սակայն ԵՄ կառույցն այնպիսին է, որ բանակցությունները հնարավոր չէ սկսել, եթե դեմ է թեկուզ մեկ պետություն: Մենք վստահ ենք, որ ԵՄ Խորհրդում Լատվայի նախագահության շրջանում առաջընթաց կգրանցվի»,- նշել է թուրք առաջնորդը, հաղորդում է ՏԱՍՍ-ը:
Լատվիայի նախագահ Անդրիս Բերզինշն իր կողմից նշել է, որ հանրապետությունն առաջվա պես պաշտպանում է Թուրքիայի ԵՄ ինտեգրացումը: «ԵՄ Խորհրդում Լատվիայի նախագահությունը 2015թ.-ի առաջին կեսին հնարավորություն կտրամադրի ԵՄ եւ Թուրքիայի միջեւ հարաբերությունների ամրապնդման նոր տարրերի որոնման համար: Նախագահության ընթացքում Լատվիայի առաջնահերթությունների թվում է ԵՄ համագործակցությունն Արեւելյան գործընկերության եւ Կենտրոնա-ասիական տարածաշրջանի երկրների հետ»,- նշել է լատվիական պետության ղեկավարը:
