Նոյեմբերի 5-ի գործով առաջին դատական նիստից առաջ՝ հունիսի 12-ին, Երեւանի Կենտրոն եւ Նորք Մարաշ համայնքների ընդհանուր իրավասության դատարանի մոտ 5 ոստիկանների հրազենային վնասվածք հասցնելու համար կալանավորված, ապա ոստիկանական բաժանմունքում բռնության ենթարկված Հայկ Կյուրեղյանի ներկայացուցիչ, փաստաբան Երվանդ Վարոսյանը բողոք է ներկայացրել ՀՀ գլխավոր դատախազ Գեւորգ Կոստանյանին: Այս մասին NEWS.am-ին ասաց փաստաբանը:
«Պահանջում ենք վերացնել ՀՀ քրեական օրենսգրքի 309-րդ հոդվածի 2-րդ մասի հատկանիշներով` բռնության գործադրմամբ պաշտոնեական լիազորություններն անցնելը, հարուցված քրեական գործը կարճելու մասին Հատուկ քննչական ծառայության որոշումը: Իսկ Հատուկ քննչական ծառայությունն էլ կարճեց գործը, որովհետեւ Հայկ Կյուրեղյանը քաղաքական ակտիվություն ունեցող մարդ է, իսկ նրան ծեծողները՝ ոստիկանները: Զարմանալի ոչինչ չկա, միշտ էլ այսպես է եղել»,- ասաց Երվանդ Վարոսյանը:
Հիշեցնենք, որ Հայկ Կյուրեղյանն իր նկատմամբ կիրառված բռնությունների վերաբերյալ դիմում էր ներկայացրել Հատուկ քննչական ծառայություն, որից հետո ՀՔԾ քննիչը նրանից գրավոր հաղորդում ու բացատրություններ էր վերցրել դեպքի առնչությամբ: Ըստ Հայկ Կյուրեղյանի՝ իրեն մարմնական վնասվածքներ են հասցրել ոստիկանական բաժանմունքում: