Խորհրդարանական ոչ իշխանական եռյակի (ՀԱԿ, ԲՀԿ, «Ժառանգություն») հոկտեմբերի 24-ի հանրահավաքին հաջորդած երթն ավարտվեց Ազատության հրապարակում առանց 3 կուսակցությունների առաջնորդների։ Վերջինները երթի մեկնարկից կարճ ժամանակ անց հեռացել էին։ (ֆոտոռեպորտաժ)
Երթի մասնակիցները Մաշտոցի, Ամիրյան փողոցներով քայլեցին դեպի Հանրապետության հրապարակ, այնուհետեւ Նալբանդյան եւ Թումանյան փողոցներով վերադարձան Ազատության հրապարակ։
ՀԱԿ խմբակցության Լեւոն Զուրաբյանը, ամփոփելով հանրահավաքը, ասաց, որ այսօր Ազատության հրապարակում կայացվել է իշխանափոխության ընթացքի մասին որոշում երեք ուժերի եւ ժողովրդի կողմից։
«Այսօր բոլորս սպասում էինք Գագիկ Ծառուկյանի վճռական խոսքին, եւ եկեք բոլորս արձանագրենք, որ այդ խոսքը հնչեց։ Մենք այս պրոցեսը չենք ձգձգելու, ոչ ոք դանդաղկոտություն ցույց չի տալու։ Մեր երեք ուժերի միասնական դիրքորոշումը Գագիկ Ծառուկյանը հայտարարեց՝ կամ լինելու է սահուն իշխանափոխություն եւ դրանից հետո արտահերթ ընտրություններ, կամ ժողովրդի կամքը կպարտադրվի համաժողովրդական շարժման պնդմամբ»,- ասաց Լեւոն Զուրաբյանը՝ նշելով, որ հետագայում հնարավոր են նաեւ նստացույցեր։
