Աբխազական երկաթուղու բացումը, առաջին հերթին, շահավետ է Վրաստանի համար, եւ ոչ միայն տնտեսական, այլ քաղաքական տեսակետից: Այդ մասին NEWS.am-ի թղթակցի հետ զրույցում հայտարարեց Ջավախքի հայ, «Միացյալ Ջավախք» քաղաքական շարժման առաջնորդ, նախկին քաղբանտարկյալ Վահագն Չախալյանը:
Նրա խոսքով՝ երբ Հայաստանում Վրաստանի այն ժամանակվա վարչապետ Բիձինա Իվանիշվիլիի կողմից հնչեց հայտարարությունն այն մասին, որ վրացական կողմը պատրաստ է բացել երկաթգիծը, ընդամենը մի քանի օր անց տեղեկությունը Թբիլիսիում հերքվեց: «Մեզ հաջողվեց ճշտել, որ դա տեղի է ունեցել ադրբեջանական իշխանությունների ճնշման հետեւանքով: Սակայն այնուհետ մենք մեր կողմից պահանջեցինք, որպեսզի երկաթգիծը բացվի: Սա բխում է Վրաստանի շահերից, ով այսօր չունի այնքան ռեսուրս, որպեսզի իրեն նման շքեղություն թույլ տա եւ հանուն Ադրբեջանի շահերի չբացի այդ երկաթուղին»,- ընդգծել է Վահագն Չախալյանը:
Վրացական իշխանությունների ներկայացուցիչները, հավելեց նա, մասնավոր զրույցների ժամանակ հայտարարում են, որ կողմ են երկաթուղու բացմանը, եւ ոչ մյուս կողմը(նկատի է առնվում ռուսական կամ աբխազական կողմը՝ խմբ.) չի ցանկանում: «Երկու կողմերը հայտարարում են, որ պատրաստ են բացել երկաթուղին, նշանակում է, խնդիրը պետք է լուծվի»,- կարծիք հայտնեց Վահագն Չախալյանը: