Ֆիննական Valio կոնցեռնը հերքում է կաթնաշաքարից զերծ կաթում հակաբիոտիկների առկայության հնարավորությունը: Այս մասին «Յուլե» հեռուստաընկերությանը հայտնել է ընկերության ներկայացուցիչ Պիա Կոնուտենը: «Մենք հանգամանորեն ուսումնասիրում ենք հակաբիոտիկները: Որակի հանդեպ մեր վերահսկողության շնորհիվ կաթում կամ պանրում դրանց ի հայտ գալն ուղղակի անհնար է»,- ասել է նա:
Կոնուտենի խոսքով՝ ֆիննական ընկերությունը չի ստացել իր արտադրանքի նմուշները ստուգող ռուսաստանցի մասնագետների եզրակացությունը, փոխանցում է ՏԱՍՍ-ը:
Մոսկվայում «Ռոսսելխոզնադզոր»-ի ղեկավար Սերգեյ Դանկվերտը հայտնել էր, որ Ֆինլանդիայից ներկրվող կաթնաշաքարից զերծ կաթը կարող է արգելվել՝ Valio-ի արտադրանքում հակաբիոտիկներ հայտնաբերելու պատճառով:
