Երեւանի եւ քույր եւ բարեկամ քաղաքների միջեւ համագործակցության ծրագրի շրջանակում վարչական շրջանների միջեւ գործընկերային կապերին եւ համագործակցությանն առնչվող հարցեր են քննարկվել աշխատանքային այցով ՌԴ հյուսիսային մայրաքաղաք Սանկտ Պետերբուրգում գտնվող մայրաքաղաքի Արաբկիր վարչական շրջանի ղեկավար Հրայր Անտոնյանի եւ Սանկտ Պետերբուրգի Վասիլեօստրովսկի վարչական շրջանի ղեկավար Յուլիա Կիսելյովայի միջեւ տեղի ունեցած հանդիպման ընթացքում: Հանդիպմանը ներկա է եղել նաեւ Սանկտ Պետերբուրգում ՀՀ հյուպատոս Հրայր Կարապետյանը: Կողմերը քննարկել են վարչական շրջանների միջեւ գործընկերային կապերի ընդլայնման ներուժն ու նախանշել այն հիմնական ոլորտները, որոնց ուղղությամբ արդեն մոտ ապագայում առավել գործնական քայլեր կձեռնարկվեն: Հրայր Անտոնյանն ընդգծել է, որ Երեւանի քաղաքապետ Տարոն Մարգարյանը խիստ կարեւորում է նմանատիպ հանդիպումները գործընկերային կապերի ամրապընդման եւ ընդլայնման համատեքստում:
Այցի շրջանակում տեղի ունեցել նաեւ Երեւանի քաղաքապետ Տարոն Մարգարյանի նախաձեռնությամբ ՌԴ հյուսիսային մայրաքաղաք Սանկտ Պետերբուրգի Վասիլեօստրովսկի վարչական շրջանի կենտրոնական մասում հայկական խաչքարի տեղադրման հանդիսավոր արարողությունը:
Այն, ի դեպ, առաջին խաչքարն է ՌԴ հյուսիսային մայրաքաղաքում եւ, ինչպես նշել են բացման հանդիսավոր արարողության մասնակիցները, այն ինքնատիպ ուխտատեղի կդառնա հատկապես տեղի հայության համար: Խաչքարի բացման պատիվը վերապահվել է Վասիլեօստրովսկի վարչական շրջանի ղեկավար Յուլիա Կիսելյովային եւ Արաբկիր վարչական շրջանի ղեկավար Հրայր Անտոնյանը: Հանդիսավոր արարողությանը մասնակցել են Սանկտ Պետերբուրգում ՀՀ հյուպատոս Հրայր Կարապետյանը, հայ համայնքի ներկայացուցիչներ: Նախնական պայմանավորվածության համաձայն՝ այգին, որտեղ տեղադրվել է խաչքարը, շուտով կվերանվանվի ու կկոչվի Երեւանյան, իսկ խաչքարի հարեւանությամբ արդեն հաջորդ տարի կտեղադրվի մեծն Կոմիտասի հուշարձանը:
