Պատկան մարմիներն արել են ամեն ինչ՝ Հոկտեմբերի 27-ի ոճրագործությունը բացահայտելու համար։ Այս մասին այսօր՝ Հոկտեմբերի 27-ի 15-րդ տարելիցին, լրագրողների հետ զրույցում ասաց վարչապետ Հովիկ Աբրահամյանը։
«Մենք ցավով ենք հիշում այս ոճրագործությունը, դատապարտում ենք, եւ վստահ եմ, որ պատկան մարմինների կողմից արվեց ամեն ինչ, որ այս ոճրագործությունը բացահայտվի, եւ այսօր մենք ունենք այն, ինչ ունենք»,- ասաց վարչապետը։
Լրագրողների դիտարկմանը, որ ընդդիմադիրների կարծիքով՝ հոկտեմբերի 27-ի իրական մեղավորները չեն բացահայտվել իշխանությունների քաղաքական կամքի բացակայության պատճառով, Հովիկ Աբրահամյանը նկատեց, որ այն ժամանակ, երբ իշխանությունները աշխատում էին ոճրագործությունը բացահայտելու ուղղությամբ, պատկան մարմիններում կային նաեւ զոհվածների հարազատներից, ի դեմս՝ վարչապետի, եւ քաղաքական կամքի բացակայություն ինքը չի տեսնում։
Հիշեցնենք, որ 15 տարի առաջ հոկտեմբերի 27-ին ահաբեկիչների խումբը՝ Նաիրի Հունանյանի գլխավորությամբ, ներխուժեց Հայաստանի ԱԺ նիստերի դահլիճ եւ դիմահար կրակոցներով սպանեց կառավարության եւ եւ խորհրդարանի անդամներին: Ահաբեկչության զոհ դարձան երկրի վարչապետ, Սպարապետ Վազգեն Սարգսյանը, խորհրդարանի խոսնակ Կարեն Դեմիրճյանը, ԱԺ փոխնախագահներ Յուրի Բախշյանն ու Ռուբեն Միրոյանը, օպերատիվ հարցերի նախարար Լեոնարդ Պետրոսյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը եւ Միքայել Քոթանյանը:
Ահաբեկիչների նկատմամբ դատավարությունը տեւեց երեք տարի (2001-2003): 6 ահաբեկիչները, այդ թվում նրանց ղեկավար Նաիրի Հունանյանը, նրա եղբայր Կարեն Հունանյանը, նրա քեռին՝ Վռամ Գալստյանը, Դերենիկ Բեջանյանը, Էդիկ Գրիգորյանը եւ Աշոտ Կնյազյանը դատապարտվեցին ցմահ ազատազրկման: Համլետ Ստեփանյանը դատապարտվեց 14 տարվա ազատազրկման:
3 տարի տեւած դատավարությունն այդպես էլ չկարողացավ կամ չցանկացավ վեր հանել ահաբեկչության կազմակերպիչներին եւ մինչ օրս էլ հասարակությունը լուրջ կասկածներ ունի կազմակերպիչների մասով: Շատերը պնդում են, որ դրա թիկունքում կանգնած է եղել իշխանության այն հատվածը, որը ահաբեկչությունից հետո ամբողջությամբ տեր դարձավ երկրի իշխանությանը: