Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի միջեւ «հիանալի մթնոլորտ էր տիրում» հոկտեմբերի 27-ին Փարիզում կայացած հանդիպման ավարտից հետո, որն ամփոփվել էր Ֆրանսիայի նախագահ Ֆրանսուա Օլանդի հետ ընթրիքով: Այս մասին հայտարարել են Ֆրանսիայի նախագահի շրջապատի ներկայացուցիչները, փոխանցում է France-Presse-ը: Այնուամենայնիվ, գործակալությունը նշում է, որ նախագահների հանդիպումները համաձայնագրի ստորագրման չեն հանգեցրել:
NEWS.am-ն ավելի վաղ հայտնել էր, որ Փարիզում հոկտեմբերի 27-ին ավարտվել են ԼՂՀ հիմնախնդրի կարգավորման հարցով բանակցությունները, որոնք նախաձեռնել էր Ֆրանսիայի նախագահ Ֆրանսուա Օլանդը եւ որին մասնակցել էին ԵԱՀԿ Մինսկի խմբի համանախագահներն ու ԵԱՀԿ գործող նախագահի անձնական ներկայացուցիչ Անջեյ Կասպրշիկը: Դրանից հետո կայացել էր Սերժ Սարգսյանի եւ Իլհամ Ալիեւի առանձնազրույցը: Բանակցությունների արդյունքներն ամփոփվել էին ուշ երեկոյան` նախագահներ Ֆրանսուա Օլանդի, Սերժ Սարգսյանի, Իլհամ Ալիեւի, ինչպես նաեւ ԵԱՀԿ ՄԽ համանախագահներ Իգոր Պոպովի (Ռուսաստան), Ջեյմս Ուորլիքի (ԱՄՆ), Պիեռ Անդիոյի (Ֆրանսիա) եւ Անջեյ Կասպրշիկի մասնակցությամբ: