Գիտությունների ազգային ակադեմիայի պատմության ինստիտուտի տնօրեն Աշոտ Մելքոնյանը կարծում է, որ ջավախքցիները ավելի շատ հոգեւոր սննդի կարիք ունեն, քան նյութական եւ որ Ջավախքը ոչ թե ջրբաժան, այլ բարեկամության կամուրջ կարող է հանդիսանալ Վրաստանի եւ Հայաստանի միջեւ։ Այս մասին նա ասաց լրագրողների հետ հանդիպման ժամանակ, որը կրում էր «Ոսկե Ծիրան»-ը անիվների վրա՝ Ջավախքում" խորագիրը:
Թեեւ ասուլիսը մշակութային ուղղվածություն ուներ, սակայն Ա. Մելքոնյանը խոսեց ավելի շատ քաղաքական թեմաներից: Նրա խոսքով, «Ջավախքը երբեւէ չի կարող թշնամության դեր կատարել, չնայած Վրաստանը ընկալում է նրան, որպես հոգու անջատվածության ու սեպարատիզմի շրջան։ Վրաստանը դեմոկրատիկ պայթյունի վտանգի առջեւ է կանգնած, նրա շահերը պետք է համընկնեն Հայաստանի հետ։ Վրաստանը փորձում է մերձենալ Ադրբեջանի եւ Թուրքիայի հետ, որը կործանարար է թե Հայաստանի, եւ թե Վրաստանի համար»:
Ա. Մելքոնյանը նշեց նաեւ, թե քանի որ Վրաստանը «ՆԱՏՕ-ական» է, իսկ Հայաստանը ռուսամետ՝ վրացիների կողմից Հայաստանի նկատմամբ ավելորդ զգուշավորություն է նկատվում։
