2014թ. Հայաստանում վարկային տոկոսադրույքները նվազել են: Այս մասին հոկտեմբերի 28-ին խորհրդարանում լրագրողներին հայտնել է ՀՀ ԿԲ նախագահ Արթուր Ջավադյանը: Նա նշել է, որ սա կապված է բանկային համակարգի վարկային պորտֆելի աճի դանդաղման հետ:
«Եթե նախորդ տարիներին այն միջինն աճել էր 35%-ով ապա այս տարի տեմպերը բավական ցածր են», - նշել է Ջավադյանը: Այստեղ պատճառները երկուսն են, հավելել է նա: Առաջին, սա բանկերի պահպանողական քաղաքականությունն է եւ եվրագոտու ու Ռուսաստանի ճգնաժամային իրավիճակը: «Բանկերը սկսել են ավելի զգուշորեն վարկավորել, իսկ հաճախորդների համար մրցակցությունն աճել է», – պարզաբանել է Ջավադյանը:
Նշենք, որ գարնանից մինչեւ աշուն կարճաժամկետ վարկերի դրույքները մի փոքր աճել են: Ըստ Ազգային վիճակագրական ծառայության տվյալի` մարտին այդպիսի վարկերի միջին դրույքը տարեկան 16,72% էր, օգոստոսին` 17,12%:
