NEWS.am-ը զգալի կրճատումներով ընթերցողի ուշադրությանն է ներկայացնում լրագրող Քլեր Գատինուայի՝ ֆրանսիական «Le Monde» պարբերականում հրապարակված հոդվածը:
«Երդվյալ թշմանիները՝ Հայաստանի եւ Ադրբեջանի նախագահներ Սերժ Սարգսյանն ու Իլհամ Ալիեւը, հանկարծ «ընկերներ» են դարձել: Գրեթե: «Քանի դեռ չէր հիշատակվում Լեռնային Ղարաբաղի թեման, «նրանք շատ մտերիմ էին», «համախոհներ»,- դեռեւս զարմացած՝ ասում է ֆրանսիացի դիվանագետը: «Մենք տեսնում էինք, թե նրանք ինչպես էին զրուցում եւ միմյանց հետ դու-ով խոսում»:
Ո՞վ է պատասխանատու այս հրաշքի համար: Հնարավոր է՝ Ֆրանսուա Օլանդը: Հոկտեմբերի 27-ին Լեռնային Ղարաբաղի հարցով գագաթաժողովի ընթացքում նրանց Ելիսեյան պալատում հյուրընկալած Ֆրանսիայի նախագահը փորձում էր բազմազան դարձնել քննարկման թեմաները, որպեսզի Սարգսյանն ու Ալիեւը չկենտրոնանան միայն կոնֆլիկտային այդ տարածքի ուղղությամբ: «Նրանք իրենց հաշիվ էին տալիս, որ ընդհանուր մարտահրավերներ ունեն, որ նույն խնդիրներին են բախվում»,- ասաց դիվանագետը:
Ֆրանսիացի դիվանագետի խոսքով՝ այս ամառվանից «եղանակը վատ է»: Խրամատային պատերազմի մթնոլորտը վերածնվեց, եւ տասնյակ զոհեր արձանագրվեցին: Օլանդի խորհրդականներն ուրախ են երկուշաբթի ձեռք բերած արդյունքի առիթով: «Մենք լավ գործ արեցինք»,- հավաստեց նախագահի մերջավորներից մեկը: «Արդյունքը», սակայն, չնչին է: Հայաստանն ու Ադրբեջանը բզկտող հակամարտության լուծումը չի երեւում՝ բացի 2015 թվականի սեպտեմբերին Նյու Յորքում երկխոսությունը շարունակելու մասին խոստումից:
Այդ դեպքում ի՞նչ: Եթե Փարիզը հիացած է, ապա այն պատճառով, որ նախագահներին միմյանց հետ խոսելու հնարավորություն ընձեռեց: Հնարավոր է՝ նաեւ այն պատճառով, որ առաջ մղեց Լեյլա Յունուսի գործը. մարդու իրավունքների հարցերով ակտիվիստ, ով ամուսնու հետ Ադրբեջանում ձերբակալվել է լրտեսության մեղադրանքով: «Ալիեւը պարտավորություն ստանձնեց»,- ասաց պետության ղեկավարի մերձավոր շրջապատի աղբյուրը:
Սակայն նախագահի շրջապատը գոհ է նաեւ Ֆրանսիայի դիրքերի ամրապնդման առիթով այդ տարածքներում, որը Ռուսաստանի ազդեցության տակ է, եւ որը Եվրոպայի հետ մերձեցման ցանկություն ունի: Կարգախոսն այսպիսին է. «Ամենից առաջ՝ նրանց չստիպել ընտրություն կատարել Ռուսաստանի եւ Եվրամիության միջեւ»: «Խոսքը Ռուսաստանի հետ հարաբերությունները խզելու մասին չէ: Մենք չենք ցանկանում ծուղակն ընկնել»,- հավելեց դիվանագետը:
Արդյո՞ք դա Ուկրաինայի հարցում Եվրոպայի սխալների մասին չէ: Որոշների կարծիքով՝ հենց Եվրամիության դիրքորոշումը, որն Ուկրաինային հրահրեց Ասոցացման համաձայնագրի ստորագրման միջոցով մերձենալ Հին աշխարհին, զայրացրեց Վլադիմիր Պուտինին: Ֆրանսիան, որը պետք է մինչեւ ամսվա վերջը որոշի, իր «Միստրալ» նավերն ուղարկի, թե՝ ոչ, կհոգա՞, արդյոք, Մոսկվային չբարկացնելու մասին»:
