ՎիվաՍել-ՄՏՍ-ը շարունակում է աջակցել երկրի` առանցքային ենթակառուցվածքների զարգացմանը, մասնավորապես՝ Արտակարգ իրավիճակների նախարարությանը (ԱԻՆ), արտակարգ իրավիճակներում տեղեկատվության եւ տվյալների անվտանգության կառավարման, ինչպես նաեւ պետական կարեւորագույն ենթակառուցվածքների անխափան աշխատանքի ապահովման նպատակով:

Արտակարգ իրավիճակների նախարարությանը տրվել է դիզելային գերհզոր գեներատոր, որը ծառայելու է որպես էլեկտրաէներգիայի այլընտրանքային աղբյուր՝ սերվերային տնտեսության պահուստային կենտրոնի (ՍՊԿ) անխափան էլեկտրասնուցման նպատակով: Ավելի վաղ, ՎիվաՍել-ՄՏՍ-ը հատկացրել է 50 միլիոն դրամ՝ ՀՀ կառավարության սերվերային տնտեսության պահուստային կենտրոնի ստեղծման նպատակով: ՍՊԿ-ի ստեղծումն ուղղված է ճգնաժամային իրավիճակներում կառավարման համակարգերի անվտանգ կենսագործունեության ապահովմանը: Արտակարգ իրավիճակների նախարարությունում տեղակայված ՍՊԿ-ն ստեղծվել է խաղաղ ժամանակաշրջանում՝ արտակարգ իրավիճակներում բնակչության պաշտպանության եւ պատերազմական ժամանակաշրջանում՝ քաղաքացիական պաշտպանության միջոցառումների արագ կազմակերպման, առանցքային տեղեկատվու¬թյան հուսալի պահպանման, արդյունավետ ու անվտանգ կիրառման, ինչպես նաեւ պետական մարմինների պահուստային տեղեկատվական համակարգերի կենտրոնացման եւ դրանց շահագործման բարելավման նպատակով:

Որակի, արդյունավետության, հուսալիության, շրջակա միջավայրի վրա ներգործության չափորոշիչներին համապատասխանող եռաֆազ «Perkins P440E» 400 վոլտ լարում ապահովող, գեներատորը կարող է արտադրել ժամում 360 կՎտ հզորության էլեկտրաէներգիա:

«Թե՛ պետական, թե՛ կոմերցիոն ենթակառուցվածքների համար առաջնային կարեւորության հարց է ճգնաժամային իրավիճակների կանխարգելման եւ դրանց հակազդման ու կառավարման համակարգերի լիարժեք պատրաստվածությունը: Դա նաեւ ենթադրում է անհարժեշտ սարքավորումների առկայություն: Այդ սարքավորումները կարեւոր նշանակություն կարող են ունենալ հատկապես մեր երկրի համար՝ հաշվի առնելով առկա վտանգները: Այդ է պատճառը, որ բարձրակարգ սարքավորումներ կիրառող ՎիվաՍել-ՄՏՍ-ն այդպիսի մեկ սարքավորում էլ տրամադրել է ԱԻՆ-ին՝ ճգնաժամային իրավիճակներում ենթակառուցվածքների աշխատանքի անխափան ապահովման նպատակով: Մենք ջանք չենք խնայում ճգնաժամային իրավիճակների կառավարման եւ կանխարգելման արդյունավետ մեխանիզմների ստեղծման գործում պետությանն օժանդակելու հարցում»,-նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: