ԵՄ-ն Հայաստանի համար կարեւոր գործընկեր է մնում: Այս մասին ԱԺ-ում հոկտեմբերի 30-ին 2015թ. պետբյուջեի նախագծի քննարկման ժամանակ հայտարարել է արտգործնախարարի տեղակալ Շավարշ Քոչարյանը:
Ըստ նրա՝ Հայաստանը-ԵՄ հարաբերությունները շարունակում են զարգանալ: «Հայաստանը շարունակում է ակտիվ մասնակցել «Արեւելյան գործընկերության» ծրագրերին: Մեր հարաբերությունները զարգանում են տարբեր ուղղություններով: Կողմերը համաձայնության են եկել նոր հարաբերությունների իրավական հիմքների առնչությամբ: Առաջիկայում նախատեսվում են աշխատանքային հանդիպումներ՝ Հայաստանի եւ ԵՄ-ի միջեւ հարաբերություններում տնտեսական բաղադրիչների հարցով, դրանից հետո կսկսվեն քաղաքական խորհրդակցություններ՝ համագործակցության նոր ուղղության ձեւավորման շուրջ», - ասել է Քոչարյանը:
Նա նաեւ նշել է, որ Հայաստանը շահագրգռված է ԵՄ-ի հետ հարաբերությունների շարունակման եւ ամրապնդման մեջ, եւ երկիրը գործադրում է բոլոր հնարավոր ջանքերը ԵՄ-ի հետ հակասությունները բացառելու համար՝ ԵՏՄ-ին Հայաստանի անդամակցությանը զուգահեռ: «Մենք պետք է նշենք այն բնագավառները, որտեղ կարող ենք ազատ գործել՝ առեւտրի առումով», - նշել է Շավարշ Քոչարյանը:
