Հոկտեմբերի 28-ին Լեռնային Ղարաբաղի Հանրապետության արտաքին գործերի նախարար Կարեն Միրզոյանը Կանադա այցի շրջանակներում «Հարավային Կովկասի տարածաշրջանային անվտանգությունը եւ մարդու հիմնարար իրավունքների պաշտպանությունը» խորագրով դասախոսություն է կարդացել Օտտավայի Քարլթոն համալսարանում, որի ընթացքում ներկայացրել է ադրբեջանա-ղարաբաղյան հակամարտության խաղաղ կարգավորման ներկայիս փուլը, ինչպես նաեւ անդրադարձել անկախության տարիների ընթացքում ԼՂՀ ունեցած ձեռքբերումներին եւ առկա մարտահրավերներին:
Դասախոսությանը ներկա են գտնվել Քարլտոնի եւ Օտտավայի համալսարանների ուսանողներ եւ Օտտավայի հայ համայնքի ներկայացուցիչներ:
Հոկտեմբերի 29-ին Կարեն Միրզոյանը Կանադայի խորհրդարանում հանդիպել է Կանադա-Հայաստան խորհրդարանական բարեկամության խմբի անդամների հետ։ Հանդիպման ընթացքում ԼՂՀ արտաքին գերատեսչության ղեկավարը ներկայացրել է ԼՂՀ-ում պետականաշինության եւ Արցախի միջազգային ճանաչման գործընթացները, ինչպես նաեւ ադրբեջանա-ղարաբաղյան հակամարտության խաղաղ կարգավորման ներկայիս փուլը։
Նույն օրը Կարեն Միրզոյանը Կանադայում ՀՀ դեսպանատանը հանդիպել է Օտտավայի հայ համայնքի ղեկավարների եւ համայնքային կազմակերպությունների անդամների հետ։ Հանդիպման ընթացքում Կարեն Միրզոյանը ներկայացրել է ԼՂՀ արտաքին քաղաքականության գերակա ուղղությունները եւ պատասխանել ներկաների հարցերին։