Ձեւ անելով, թե Լեռնային Ղարաբաղը գոյություն չունի, Ադրբեջանը առաջընթացի չի հասնի բանակցություններում: Այս մասին, այսօր՝ հոկտեմբերի 30-ին, ԱԺ-ում հայտարարել է Հայաստանի ԱԳ փոխնախարար Շավարշ Քոչարյանը: Նրա խոսքով՝ ակնհայտ է, որ Ադրբեջանն օգտագործում է ԼՂ բանակցությունները որպես շղարշ, որպեսզի շարունակի իր քաղաքականությունը:
Այդուհանդերձ, 1992-94 թվականներին Ադրբեջանը ուղիղ բանակցություններ է վարել Ղարաբաղի հետ, այդ թվում 1994-ին, երբ կնքվել է հրադադարը: Այն ժամանակ Ստեփանակերտի հետ երկխոսությունն ընթանում էր նույնիսկ առանց Հայաստանի: «1994-ին սկզբունքորեն առաջարկվում էր, որ հրադադարի համաձայնագիրը ստորագրեն Ստեփանակերտն ու Բաքուն: Հետո, որպես ներգրավված կողմ ստորագրեց նաեւ Հայաստանը, իսկ Ադրբեջանի նախագահ Հեյդար Ալիեւը այն ժամանակ լիազորեց Մեջլիսի փոխնախագահին ուղիղ բանակցություններ վարել ԼՂ ներկայացուցչի հետ:
Այս պատմական էքսկուրսն ապացուցում է, որ բանակցություններում առաջընթաց չի լինելու, քանի դեռ Ղարաբաղը Ադրբեջանի համար իբր գոյություն չունի»,-հավելել է Քոչարյանը: