Չինական Lenovo ընկերությունն ավարտել է Google-ից Motorola Mobility սմարթֆոնների արտադրության բիզնեսը ձեռք բերելու՝ 2.91 մլրդ դոլար արժողությամբ գործարքը: Այս մասին տեղեկացնում է ՏԱՍՍ-ը՝ վկայակոչելով Lenovo-ի պաշտոնական հաղորդագրությունը:
Ձեռք բերված պայմանավորվածության համաձայն՝ Lenovo-ն 1.41 մլրդ վճարել է գործարքի ավարտի պահին, իսկ մնացած 1.5 մլրդ դոլարը վճարելու է երեք տարվա ընթացքում:
Ըստ համաձայնության պայմանների, Lenovo-ն ձեռք է բերում Motorola ապրանքանիշը, Motorola սմարթֆոնների մոդելային շարքը, այդ թվում՝ Moto X-ը, Moto G-ն, Moto E-ն, DROID սմարթֆոնները, ինչպես նաեւ Motorola ապրանքանիշի ներքո մշակված ծրագրերն ու արտադրանքի զարգացման նախագծերը (ներառյալ Moto 360 սմարթ-ժամացույցները): Google-ն իր հերթին կպահպանի Motorola Mobility պատենտային պորտֆելը:
Սպասվում է, որ այդ գործարքի շնորհիվ Lenovo-ն կդառնա սմարթֆոն արտադրող աշխարհի խոշորագույն երրորդ ընկերությունը, իսկ Motorola-ն կլինի Lenovo-ի դուստր ձեռնարկությունը: Ferra կայքի փոխանցմամբ՝ Motorola Mobility-ի բոլոր 3.500 աշխատակիցները, այդ թվում նրա ղեկավար Ռիք Օստերլոն, կպահպանեն աշխատատեղերը:
Հիշեցնենք, որ երկու ընկերությունների միջեւ ձեռք բերված համաձայնության մասին առաջին անգամ հայտնի դարձավ այս տարվա հունվարին: 2011 թվականին Google-ը Motorola Mobility-ն բաժնետերերից ձեռք բերեց 12.5 մլրդ դոլարով:
