Սեփական բնակարանը գրավադրելու միջոցով Գյումրիում խեցեգործության արհեստանոց բացած՝ Իտալիայի հյուպատոս Անտոնինո Մոնտալտոն այսօր՝ հոկտեմբերի 30-ին, պարգեւատրվեց Գյումրիի քաղաքապետի ոսկե հուշամեդալով։ Հուշամեդալը հյուպատոսին հանձնեց Գյումրիի քաղաքապետ Սամվել Բալասանյանը։
Մի քանի օր գործող՝ խեցեգործության արհեստանոցում արդեն պատրաստվել է առաջին հուշանվերը՝ Գյումրիի զինանշանը։ Անտոնինո Մոնտալտոն վստահեցրեց, որ ներդրումներն այսքանով չեն սահմանափակվելու։
«Մենք պատրաստ ենք օգնել Գյումրիում արհեստը զարգացնելուն։ Սա աշխատատեղ ունենալու հարցի բարելավում է, զբոսաշրջիկներին հետաքրքիր կոլորիտ ցույց տալու միջոց։ Ես վստահ եմ, որ մենք շարունակելու ենք աշխատել Գյումրիում»-ասաց նա։
Արհեստանոցում առայժմ 10 մասնագետ է աշխատում, սակայն, ինչպես նշեց հյուպատոսը, առաջիկայում նրանց թիվը կավելանա։