Ուկրաինայի, Ռուսաստանի եւ ԵՄ-ի ներկայացուցիչները համաձայնագիր են ստորագրել` Ուկրաինա ձմեռային ամիսներին ռուսական գազի մատակարարման վերաբերյալ:
Եվրահանձնաժողովի հեռացող նախագահ Ժոզե Մանուել Բարոզուն, որը ներկա է եղել Բրյուսելում ստորագրման արարողությանը, հայտարարել է. «Այժմ եվրոպացիները առանց ջեռուցման չեն մնա»:
Բանակցություններն ընդհատվել են վաղ առավոտյան, երբ Գազպրոմի ղեկավար Ալեքսեյ Միլլերը եւ ՌԴ էներգետիկայի նախարար Ալեքսանդր Նովակը ԵՄ-ից պահանջել են Ուկրաինայի համար ֆինանսական ավելի մեծ երաշխիքներ` գազի վճարման առնչությամբ: Բանակցությունները վերսկսվել են եւ ավարտվել երեկոյան:
Ուկրաինայի վարչապետ Արսենի Յացենյուկը նշել է, որ Կիեւը պատրաստ է մարել պարտքերը` համաձայնագրից անմիջապես հետո:
Ըստ նրա` 1.45 մլրդ դոլարը պետք է անհապաղ վճարել, 1.65 մլրդ դոլարը` հետո:
Իր հերթին ՌԴ էներգետիկայի նախարար Ալեքսանդր Նովակը հայտարարել է, որ Ուկրաինայի հետ պետք է աշխատել կանխավճարով: