ԱՄՆ գիտնականներն ալգորիթմ են ստեղծել, որը թույլ է տալիս գաղտնազերծել մարդու մտքերը, հայտնում է Lenta.ru-ն` վկայակոչելով Frontiers in Neuroengineering գիտական թերթը:
Աղբյուրը նշում է, որ գիտնականները մի շարք փորձեր են կատարել, որոնք ապացուցել են այն հիպոթեզը, որ բարձրաձայն եւ մտքում խոսելու դեպքում նյարդաֆիզիոլոգիական նույն մեխանիզմներն են օգտագործվում: Նյարդաֆիզիոլոգները գրանցել են ընկնավորությամբ տառապող յոթ հիվանդի ուղեղի ակտիվությունը: Հիվանդներից ամեն մեկին խնդրել են տեքստը սկզբում բարձրաձայն կարդալ, այնուհետեւ` մտքում: Ստացված տվյալների հիման վրա` գիտնականներին հաջողվել է սպեկտագրամա ստեղծել եւ հատուկ ծրագիր, որը վերարտադրում է սկզբնական տեքստը:
Երբ այդ սարքը կիրառել են մտքում կարդացող հիվանդների նկատմամբ, այն հաջողությամբ կարողացել է վերականգնել սկզբնական բառերը` փաստորեն կարդալով մարդու մտքերը:
Աղբյուրը նշում է, որ նոր ալգորիթմը դեռեւս կատարյալ չէ: Սակայն գիտնականները հուսով են դրա հիման վրա «պրոտեզ» ստեղծել կաթվածահար եղածների, խոսելու ունակությունից զրկվածների համար: Հիվանդները կարող են մտածել, իսկ մեքենան կարող է թարգմանել ներքին խոսքը շրջապատողների համար:
