Կենտրոն եւ Նորք-Մարաշ ընդհանուր իրավասության դատարանում այժմ քննարկվում է քրեական հեղինակություն Զապին՝ Անդրանիկ Սողոյանին կալանավորելու հարցը: Այս մասին հայտնեցին NEWS.am-ի աղբյուրները:
Մեր տեղեկություններով՝ նրան կալանավորելու հարցով դիմել է դատախազությունը: Զապին կալանավորելուց հետո միայն կսկսվեն նրա հետ կապված իրավական գործընթացները, քաղաքացիության ճշտում, Չեխիայի իրավապահներին դիմել, քրեական գործի նյութերը վերցնել եւ այլն:
Նշենք, որ Քրեական հեղինակություն Զապը՝ Անդրանիկ Սողոյանը, մի քանի տարի է՝ գտնվում է Հայաստանում: Շորթման եւ սպանության գործով 13 տարի ազատազրկման դատապարտված Սողոյանին սրանից որոշ ժամանակ առաջ եւս ձերբակալել էին, սակայն Չեխիայի կողմից չունենալով որեւէ փաստաթուղթ, նրան ազատ են արձակել:
NEWS.am-ի աղբյուրները հայտնել էին, որ այս անգամ համապատասխան փաստաթղթի առկայությամբ նրան ձերբակալել են: Ավելին՝ հայկական կողմը մտադիր է դիմել չեխական կողմին, որպեսզի վերցնի նրա գործի հետ կապված փաստաթղթերը եւ Զապի դատավարությունը անցկացվի Հայաստանում: Քանի որ այս պարագայում հետախուզվողը ՀՀ քաղաքացի է եւ նա հայտնաբերվել է Հայաստանում, ուստի նրան արտահանձնելու խնդիր չկա: Հայաստանում կանցկացվի ոչ միայն Անդրանիկ Սողոյանը դատավարությունը, այլեւ նա պատիժը կկրի մեր երկրում:
Հիշեցնենք, որ .2013 թ փետրվարի 28-ին Պրահայի մունիցիպալ դատարանի կողմից 1968 թ. ծնված Անդրանիկ Սողոյանը /մականունը՝ «Զապ»/ Չեխիայի Հանրապետության քրեական օրենսգրքի 219 հոդվածի 1 և 2 մասերի /սպանութուն/, 235 հոդվածի 1-ին մասի /շորթում/ մեղադրանքով հեռակա դատապարտվել է 22 տարվա ազատազրկման: 2014թ հոկտեմբերի 20-ին Անդրանիկ Սողոյանի նկատմամբ Չեխիայի Հանրապետության իրավապահ մարմինների կողմից տրվել է եվրոպական կալանքի սանկցիա, և հայտարարվել միջազգային հետախուզում: Հոկտեմբերի 30-ին ՀՀ ոստիկանության քրեական հետախուզության գլխավոր վարչության ծառայողները Երևանի Խորենացի փողոցից հայտնաբերել և բերման են ենթարկել Անդրանիկ Սողոյանին: Ա. Սողոյանը ձերբակալված է, որի մասին հայտնվել է ՀՀ գլխավոր դատախազությանը և ՀՀ-ում Ինտերպոլի ԱԿԲ-ին:
