Երեւանի պետական համալսարանում հոկտեմբերի 29-ին ֆիզկուլտուրայի դասաժամին հանկարծամահ եղած, կիրառական մաթեմատիկայի 2-րդ կուրսի ուսանող Լեւոն Հայրապետյանի կուրսեցիները կհարցաքննվեն: NEWS.am-ի՝ տեղեկություններով՝ նրանք ոստիկանությունից արդեն ծանուցում են ստացել հարցաքննության օրվա մասին:
ԵՊՀ հասարակայնության հետ կապերի եւ լրատվության վարչության ղեկավար Կարեն Գրիգորյանը NEWS.am-ին ասաց, որ ինքը նման տեղեկատվություն չունի։
Կարեն Գրիգորյանը նշեց, որ ԵՊՀ բուժկետի աշխատակիցների պարտավոր էին Ֆիզկուլտուրայի ամբիոն փոխանցել ուսանողի առողջական վիճակի վերաբերյալ փաստաթուղթը:
«Հիմա ԵՊՀ-ի ռեկտոր Արամ Սիմոնյանի հանձանարարությամբ նշանակվել է ծառայողական քննություն եւ մենք ինքներս մեծ ցանկություն ունենք պարզելու եւ ըստ փաստերի խոսելու։ Մինչեւ վերջնական ծառայողական քննություն չլինի, չենք կարող ոչ մի բան հստակ ասել»,- ասաց Կարեն Գրիգորյանը։
Նշենք, որ 19-ամյա Լեւոն Հայրապետյանը, որը սրտի բնածին արատ ուներ, հոկտեմբերի 29-ին հանկարծամահ էր եղել ֆիզկուլտուրայի դասաժամին։ ԵՊՀ բուժկետի աշխատակիցները, ավելի վաղ NEWS.am-ին փոխանցել էին, որ Լեւոնն ինքն էր թաքցրել իր հիվանդության փաստաթուղթը, որն իրենք տվել էին ընդհանուր բուժզննության ժամանակ։