Ռումինիայում, որտեղ ուրբաթ ավարտվել է նախագահական ընտրությունների քարոզարշավը, այսօր «լռության օր» է, երբ արգելվում է ցանկացած տեսակի քարոզչությունը։
Նախագահի պաշտոնը զբաղեցնում է երկու ժամկետներից հետո հեռացող Տրայան Բեսեսկուն: Ընդամենը 14 թեկնածու է առաջադրված, սակայն հարցումները վկայում են, որ 18,2 մլն ընտրողների ձայները բաշխվել են գործող վարչապետ Վիկտոր Պոնտայի, որին աջակցել է իշխող դաշինքում ընդգրկված Սոցիալ-դեմոկրատական կուսակցությունը, եւ Ազգային-լիբերալ կուսակցության թեկնածու, Սիբիուի քաղաքապետ, բնիկ գերմանացի Կլաուս Յոհանիսի միջեւ: Ըստ սոցիոլոգների` հենց նրանց միջեւ է ծավալվելու հիմնական պայքարը երկրորդ փուլում, որը տեղի է ունենալու նոյեմբերի 16-ին, եթե կիրակի ոչ ոք չհավաքի անհրաժեշտ 50%-ը, փոխանցում է ՏԱՍՍ-ը:
Դիտորդները նշում են, որ այստեղ կարեւոր կլինի, թե ում կնախընտրեն թեկնածուների կողմնակիցները, որոնք հաջորդում են վարկանիշների աղյուսակներում` Սենատի նախագահ Կելին Պոպեսկու Տերիչանու, տուրիզմի նախկին նախարար Ելենա Ուդրա, որին աջակցում է ներկայիս նախագահը, ինչպես նաեւ նախագահական մրցապայքարին մասնակցող այլ ազդեցիկ քաղաքական գործիչներ: