Ստամբուլի «Ակոս» շաբաթաթերթի նախկին գլխավոր խմբագիր Հրանտ Դինքի սպանության գործով դատավարությանը որոշում է կայացվել սպանության ժամանակ Ստամբուլում եւ Տրապիզոնում աշխատող եւ ծառայող պաշտոնյաների եւ զինվորականների դեմ հետաքննությունը միավորել։

Թուրքական Gercek gundem կայքի փոխանցմամբ՝ Թուրքիայի արդարադատության նախարարի այն որոշումից հետո, որով թույլատրվել է Դինքի սպանության գործով հետաքննություն սկսել Ստամբուլի նախկին ոստիկանապետի եւ մյուս պաշտոնյանների նկատմամբ, Ստամբուլի գլխավոր դատախազությունը գրություն է ուղարկել Տրապիզոնի դատախազություն։

Գրության մեջ պահանջվել է Տրապիզոնի ժանդարմերիայի նախկին զինվորականների եւ պաշտոնյանների նկատմամբ Դինքի գործով հետաքննության անցկացումը փոխանցել Ստամբուլի գլխավոր դատախազություն։ Դրական պատասխան ստանալով՝ Ստամբուլի գլխավոր դատախազությունը միավորել է գործերը եւ Դինքի սպանության գործով ծառայողական պարտականությունները թերի կատարած բոլոր պաշտոնյաների, զինվորականների ու ոստիկանների նկատմամբ հետաքննությունը կվարվի մեկ տեղում։