Հայաստանի իշխանություններին առաջվա նման երկխոսություն հարկավոր չէ: Այս մասին նոյեմբերի 18-ին լրագրողներին հայտնել է «Ժառանգություն» խմբակցության ղեկավար Ռուբեն Հակոբյանը՝ մեկնաբանելով Հովիկ Աբրահամյանի առաջարկը խորհրդարանական 4 ուժերի ներկայացրած 12 կետերին վերադառնալու վերաբերյալ:
Հակոբյանը նշել է, որ ինքն ու ԲՀԿ-ական պատգամավոր Միքայել Մելքումյանը հանդիպել են խորհրդարանի խոսնակ Գալուստ Սահակյանի եւ կառավարության աշխատակազմի ղեկավար-նախարար Դավիթ Հարությունյանի հետ: Եռյակի եւս մեկ ուժ՝ ՀԱԿ-ը, հանդիպմանն իր ներկայացուցչին չէր ուղարկել:
«Ցավոք, մենք հերթական անգամ տեսանք, որ իշխանությունը զուրկ է քաղաքական կամքից եւ չի ցանկանում միասին երկիրը դուրս բերել ներկայիս վիճակից: Եթե իշխանությունն իսկապես կարծում է, որ պետք է փոխել հարաբերությունները ընդդիմության հետ, ապա կա մեր առաջարկած 12 կետերից 10-րդը, որը վերաբերվում է ընտրացուցակների հրապարակմանը: Այդ առաջարկը կարելի է իրականացնել միանգամից եւ առանց ծախսերի: Առավել եւս, որ նման օրենք խորհրդարանում եղել է դեռ նախորդ գումարումներին», - ընդգծել է «Ժառանգության» ներկայացուցիչը:
Չնայած դրան, իշխանությունն, ըստ նրա, չի համաձայնում ոչ ցուցակներին, ոչ մեծամասնական պատգամավորական տեղերից հրաժարվելուն: Ըստ Հակոբյանի՝ պատճառները միանգամայն հասկանալի են. չեն ցանկանում հրաժարվել մանդատների 33%-ից (41-ը՝ 131-ից), որոնք ամբողջությամբ իշխող կուսակցությունը ստանում է խորհրդարանական ընտրություններում՝ ընտրատտարածքների հաշվին: «Դրանից հրաժարվել՝ նշանակում է կասկածի տակ դնել վերարտադրության հնարավորությունը: Չցանկանալով բացահայտ հրաժարվել երկխոսությունից՝ իշխանությունը փորձում է դրա իմիտացիա ստեղծել: Այսօր տեսնելով, որ բովանդակալից քննարկումներ չեն նախատեսվում, ես ուղիղ այդ մասին հայտարարեցի եւ հրաժարվեցի մասնակցել դրանց», - նշել է Ռուբեն Հակոբյանը: