Ոստիկանության բարեփոխումը՝ որպես քրեական արդարադատության խթանման միջոց՝ դա է ԵԱՀԿ-ի կողմից հրատարակված նոր ուղեցույցի թեման, այն այսօր ներկայացվեց Հայաստանի ոստիկանության կրթահամալիրի անձնակազմին եւ ուսանողներին:
Ուղեցույցը պարունակում է գործնական միջոցառումների կոնկրետ օրինակներ առ այն, թե ինչպես ոստիկանության բարեփոխումների շրջանակում բարելավել համագործակցությունը քրեական արդարադատության տարբեր ինստիտուտների, համապատասխան պետական մարմինների, ինչպես նաեւ անվտանգության եւ արդարադատության ոլորտներում ծառայություններ մատուցող ոչ պետական կառույցների եւ քաղաքացիական հասարակության միջեւ:
Հրատարակությունը ներկայացվեց նաեւ երեկ՝ ոստիկանության գործունեության հաշվետվողականության եւ թափանցիկության վերաբերյալ խորհրդարանական լսումների ժամանակ, որոնք կազմակերպվել էին ԵԱՀԿ երեւանյան գրասենյակի հետ համատեղ: Նույն օրը, ուղեցույցը ներկայացվեց նաեւ ոստիկանության շտաբում՝ ոստիկանության ղեկավարությանն ու ոստիկանական բարեփոխումների քաղաքականությունը մշակող աշխատակիցներին:
«Բարեփոխումները քրեական արդարադատության մեկ հատվածում պետք է ներդաշնակեցվեն այլ ոլորտներում բարեփոխումների հետ՝ բարելավելու ողջ քրեական արդարադատության գործընթացը եւ անվտանգության եւ արդարադատության մատչելիությունը բոլորի համար», - ասաց ԵԱՀԿ երեւանյան գրասենյակի ղեկավար, դեսպան Անդրեյ Սորոկինը. «Այս ուղեցույցը օգտակար կլինի Հայաստանի ոստիկանության համար, որը ներկայումս լուրջ բարեփոխումների ընթացքում է»:
Նշված նախաձեռնությունից բացի, այս շաբաթվա ընթացքում՝ Զինված ուժերի ժողովրդավարական վերահսկողության Ժնեւի կենտրոնի հետ համատեղ կազմակերպվեցին դասընթացներ ընտանեկան բռնության կանխարգելման, անչափահաս իրավախախտների եւ հանցագործության կատարման վայրի զննության վերաբերյալ:
Ուղեցույցը թարգմանվել է հայերեն ԵԱՀԿ երեւանյան գրասենյակի կողմից՝ այն հասանելի դարձնելու համար հիմնական բոլոր դերակատարներին, ովքեր ներգրավված են ոստիկանության բարեփոխումների գործընթացում:
