Պաշտոնական տվյալներով՝ Ռուսաստանից Հայաստանի ֆիզանձանց փոխանցված ոչ առեւտրային բնույթի տրանսֆերտները տարեկան կտրվածով նվազել են 10,9 մլն դոլարով կամ 6,9%-ով: Նշված ամսում մեր երկիր փոխանցված տրանսֆերտների ընդհանուր գումարը կրճատվել է մոտ 9,2 մլն դոլարով կամ 5,1%-ով:

Սեպտեմբերին «ռուսական» տրանսֆերտների գծով բացասական իրողությունը հանգեցրել է տրանֆերտների ընդհանուր գումարի շարժընթացի 6,1%-ով դանդաղեցմանը: Եթե չհաշվենք մեր հյուսիսային հարեւանին, ապա ֆիզիկական անձանց ուղարկվող արտաքին դրամական փոխանցումները աճել են մոտ 1,7 մլն դոլարով կամ 7,4%-ով: Սակայն «ռուսական» տրանֆերտներ կտրուկ անկումը ծածկել է այս փոքրիկ դրական միտումը:

Այս ոլորտում Ռուսաստանի դերն անվիճելի է: Եվ չնայած տրանսֆերտների ընդհանուր ծավալում վերջինիս տեսակարար կշռի 1,6 տոկոսային կետով նվազմանը, այդ ցուցանիշը մրցակցությունից դուրս է՝ մոտ 86%:

Ռուսաստանից ստացվող դրամական փոխանցումների կրճատման պատճառները բոլորին են հայտնի. երկրի տնտեսությում տիրող ծանր իրավիճակը, ռուսական ռուբլու նկատելի անկումը (ինչը նաեւ ազդում է դոլարով փոխարկվելու ժամանակ), այդ երկիր մուտք գործելու, ապրելու եւ աշխատանքի տեղավորվելու պայմանների խստացումը: Բացի այդ, գրեթե երկնիշ ինֆլյացիան հանգեցրել է ընթացիկ ծախսերի զգալի աճին: Իսկ դա, բնականաբար, սահմանափակում է ազատ դրամական միջոցները, որոնք դրսում աշխատողները փոխանցում են հայրենիք: