Երեւանի «Չաո բամբինո» մանկական սրճարանում նոյեմբերի 19-ի երեկոյան գազով լցված փուչիկների պայթյունի մեղավորը ոչ թե սրճարանն է, այլ «Փուչիկների աշխարհ» կազմակերպությունը, որն էլ հենց տրամադրել էր փուչիկները: Այս մասին NEWS.am-ին ասաց սրճարանի տնօրեն Գրիշա Հարությունյանը:
«Մենք փուչիկները պատվիրել էինք «Փուչիկների աշխարհ» կազմակերպությունից, թե իրենք խիղճները կորցրած ինչ գազ էին լցրել, մանկական սրճարանը չէր կարող իմանալ: Մենք հրապարակի դեպքերից հետո խուսափում էինք գազով փուչիկներից: Բայց այս անգամ մեր պատվիրատուն էր մեզ խնդրել փուչիկ պատվիրել, մենք էլ գիտեինք, որ լիցենզավորված ընկերություն է, այդտեղից պատվիրեցինք, առաջին անգամ էր, որ պատվիրում էինք»,-ասաց Գրիշա Հարությունյանը:
Տնօրենը նշեց, որ դեպքից հետո իրենք օգնություն են ցուցաբերել երեխային, որից միայն մեկ ժամ հետո ծննդյան տոնին մասնակցողները գնացել են սրճարանից, երեխայի մոտ լուրջ խնդիր չի եղել: Այսօրվանից գազով փուչիկներ սրճարան տանելն արգելվում է:
«Փուչիկների աշխարհ» կազմակերպության տնօրենի հետ կապվել չհաջողվեց, նա մեր հեռախոսազանգերին չպատասխանեց:
Ավելի վաղ NEWS.am-ը հայտնել էր, որ նոյեմբերի 19-ի երեկոյան Երեւանի «Չաո բամբինո» մանկական սրճարանում տոնակատարության ժամանակ փուչիկներ էին պայթել, ինչի հետեւանքով երեխաներից մեկը երկրորդ կարգի այրվածքներ էր ստացել:
Ոստիկանությունում դեպքի առթիվ նյութեր են նախապատրաստվում:
