Նիկարագուայի ջրանցքի կառուցումը, որը կկապի Ատլանտյան եւ Խաղաղ օվկիանոսները, կսկսվի դեկտեմբերի 22-ին՝ Ռիվաս դեպարտամենտի խաղաղօվկիանոսյան հարավային ափին: Նախագիծը վերահսկող «Մեծ ջրանցք» հանձնաժողովի ներկայացուցիչները հայտնել են, որ այն կկառուցվի Բրիտաս կոչվող վայրում:
Բրիտո նավահանգիստը նախագծի իրականացման նախնական փուլը կդառնա, նշված է Նիկարագուայի կառավարության քարտուղարության հաղորդագրությունում: Այդ փուլի ավարտից հետո այնտեղ կուղարկվի անհրաժեշտ տեխնիկա ջրանցքի կառուցման համար, որի ընդհանուր արժեքը կկազմի 50 մլրդ դոլար, հայտնում է ՏԱՍՍ-ը:
Նախագծի կապալառու հոնկոնգյան HK Nicaragua Canal Development Investment ընկերությունից հայտնել են, որ շինարարությունը վնաս չի հասցնի Նիկարագուայի ափամերձ ֆաունային եւ զբոսաշրջային կենտրոններին:
Միաժամանակ նախագծով նախատեսվում է Նիկարագուա լճի մաքրման աշխատանքների իրականացում, որի ավազանով անցնելու է ջրանցքը: Ենթադրվում է, որ դրանից դուրս բերված հողը որպես պարարտանյութ կօգտագործվի 26 հազար հա գյուղատնտեսական տարածքների եւ հսկայական ջրամբարի տարածքում արհեստական երկու կղզիների ստեղծման համար: