Կարեն Դեմիրճյանի անվան Մարզահամերգային համալիրում նոյեմբերի 17-ի երեկոյան տեղի ունեցած հրդեհը մոտ 200 մլն դրամ գույքի վնաս է հասցրել նախկին սեփականատերերին: Այս մասին այսօր՝ նոյեմբերի 21-ին, լրագրողների հետ զրույցում ասաց ՄՀՀ նախկին աշխատակից Կորյուն Գրիգորյանը:
«Մեր առաջնային խնդիրը հիմա ամբողջ պատկերը ստանալն է: Հիմա պետք է հասկանաք, այն ամբողջ տեխնիկան, որը լուրջ մակարդակի ֆրանսիական տեխնիկա է, որի ցուցակը մենք ունենք, դրա՞նք են վնասվել, թե՞ ավելին: Ինձ թույլ չեն տալիս ներս մտնել՝ պատճառաբանելով, որ խառը վիճակ է, եւ այն ինֆորմացիան, որը ես հիմա ունեմ, ուզում եմ ամբողջացնել»,- ասաց Կորյուն Գրիգորյանը՝ ավելացնելով, որ պաշտոնական գրությամբ դիմել են ԱԻՆ եւ Պաշտպանության նախարարություն, որպեսզի վնասված իրերի ցուցակը հստակեցնեն:
ՄՀՀ նախկին աշխատակցի խոսքով, վնասը մեծ չէր լինի, եթե պահպանվեին անվտանգության տարրական կանոնները:
«Աբսուրդ է, որ այդքան երիտասարդներ են հավաքվել, եւ այդ երիտասարդների անվտանգության համար չեն մտահոգվել: Անվտանգության տարրական միջոցներ չեն ձեռնարկվել, այնտեղ չի եղել «Շտապօգնության» մեքենան, նախօրոք պետք է հրշեջ ծառայությունից մեկ միավոր հրավիրված լիներ»,- ասաց Կորյուն Գրիգորյանը:
Խոսելով պատասխանատվություն կրողների մասին, Կորյուն Գրիգորյանը նշեց, որ իրենք հետամուտ են լինելու, որ բոլոր մեղավորները պատժվեն:
«Շենքը ի պահ հանձնված է եղել Պաշտպանության նախարարությանը, շահագործել է Համահայկական երիտասարդական ասոցիացիան, եղել է ՀՀԿ երիտասարդների միությունը, եւ այս շրջանակների մեջ է, որ պետք է փնտրենք մեղավորներին: Պետք է պատժվեն այն մարդիկ, որոնք հանցավոր անփութություն են ցուցաբերել այս հարցի նկատմամբ: Սա այն դեպքը չի լինելու, որ ծածկադմփոց անենք եւ գնա: Հետամուտ ենք լինելու, եւ ես ինքս աչքերս չեմ փակելու նաեւ որպես մարդ, որը երկար տարիներ աշխատել է մարզահամերգային համալիրում»,- ասաց ՄՀՀ նախկին աշխատակիցը:
Նշենք, որ նոյեմբերի 17-ին, ժամը 21.25-ին ահազանգ էր ստացվել, որ Երևանի Ծիծեռնակաբերդի խճուղում գտնվող Կ. Դեմիրճյանի անվան Մարզահամերգային համալիրի դիմահարդարման սրահից ծուխ է դուրս գալիս: Պարզվել է, որ այրվել է շոգեբաղնիքը՝ մոտ 25քմ, ջերմահարվել են հարակից սենյակները (25քմ): Հրդեհը տեղի է ունեցել համերգի ժամանակ, այն կազմակերպել էր Հայաստանի երիտասարդական հիմնադրամը: