Կոնկրետ քայլեր ձեռնարկելու եւ խոցված ուղղաթիռի երեք օդաչուներին վերադարձնելու պահանջով ԵԱՀԿ երեւանյան գրասենյակի առջեւ նոյեմբերի 17-ից հացադուլ սկսած՝ «Բարեւ Երեւան» խմբակցության անդամ Դավիթ Սանասարյանի մոտ «Շտապօգնությունը» մշտական հերթապահություն է սահմանել, թեեւ նա առողջական ոչ մի խնդիր չունի: (ֆոտոռեպորտաժ)
«Շատ լավ եմ ինձ զգում, ավելի լավ, քան 6 օր առաջ, երբ սկսեցի հաց չուտել: Առողջությունս լավ է, ճնշումս կարգավորված է, շնորհակալ եմ բժիշներից: Որեւէ խնդիր չունեմ, բացառապես էներգիա խնայելուց»,-NEWS.am-ին ասաց հացադուլավորը:
Դավիթ Սանասարյանի խոսքով՝ իր պահանջը դեռ անկատար է, Մինսկի խումբը եւ, առհասարակ, միջազգային հանրությունը, պետք է ոչ թե կոչով հանդես գան, այլ սպառնալիքներ կիրառեն Ադրբեջանի նկատմամբ:
«Ես չեմ պահանջել քայլեր, ես պահանջել եմ գործողություն եւ արդյունք: Իմ պահանջն է, որպեսզի անհապաղ քայլեր ձեռնարկվի եւ սանկցիաների սպառնալիքը գործի դրվի: Ադրբեջանը պետք է զգա սանկցիաների սպառնալիքը: Հարցը պետք է անհապաղ մտնի անվտանգության խորհուրդ, որն էլ պետք է հարգի ՄԱԿ-ի կողմից ընդունված կոնվենցիաները եւ գործուն քայլեր ձառնարկի»,-ասաց նա:
Դավիթ Սանասարյանի խոսքով՝ եթե միջազգային հանրությունը, հատկապես ԱՄՆ-ն ուշացնեն հստակ դիրքորոշում հայտնելը, պատերազմն անխուսափելի կլինի:
«Ինչպես ԱՄՆ-ն որոշ ժամանակ անց հստակ դիրքորոշում հայտնեց Ուկրաինայում վիճակի վերաբերյալ, որտեղ Ռուսաստանին մեղադրում էին այլ պետության գործերի մեջ խառնվելու եւ պատերազմ հրահերու մեջ, այս պարագայում Ադրբեջանը հրահրում է պատերազմ , ու այդ հրահրոցին միանում է միջազգային հանրությունը: Ժամանակը գնում է, իրենք ուշանում են, եթե մի քանի օր հետո սկսեն գործողություններ անեն, ուշացած կլինի»,-ասաց նա:
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ է: Հակառակորդը շարունակում է տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ: Նախնական տեղեկություններով՝ երեք օդաչու զոհվել է:
Հիշեցնենք, որ ԵԱՀԿ Մինսկի խմբի համանախագահները հայտարարություն էին տարածել, որով Ադրբեջանին կոչ են անում հնարավորություն տալ վերադարձնել նոյեմբերի 12-ին խոցված հայկական ուղղաթիռի զոհերի մարմինները:
Լուսանկարները՝ Արսեն Սարգսյանի/NEWS.am