Հայաստանում ընտրական կարգը պետք է լինի եւ մեծամասնական եւ համամասնական ձեւով, որպեսզի քաղաքացին հնարավորություն ունենա իր նախընտրած թեկնածուին ընտրելու: Այդ մասին NEWS.am֊ի թղթակցի հետ զրույցում ասել է ՀՀԿ-ական պատգամավոր Աշոտ Աղաբաբյանը՝ անդրադառնալով ոչ իշխանական օժերի ԸՕ-ի փոփոխության պահանջին
«ՀՀ-ի նման փոքր տարածք ունեցող երկրներում պետք է անպայման մեծամասնականը լինի, որպեսզի քաղաքացին հնարավարություն ունենա իր ընտրությունը կատարելու, իր նախընտրած թեկնածուին ընտրելու, քաղաքացին ընտրում է գործնական թեկնածուին, ով կանգնելու է իր կողքին»,- նշել է նա:
Դիտարկմանը, թե ոչ իշխանականները գտնում են, որ մեծամասնական ընտրակարգով կեղծիքներն ու ընտրախախտումները ավելի շատ են լինում, Աղաբաբյանն ասել է. «Իրենք ուղղակի չգիտեն ինչ խոսեն, նրանք փորձում են չհիմնավորված պահանջներ ներկայացնել: Ես ապացուցել եմ, որ ինձ ձայն տվողները, ձայն են տալիս նաեւ իմ կուսակցությանը, դրա համար ես էդ պրոբլեմը չունեմ, առանձին էլ առաջադրվեմ, կուսակցությունով էլ, նույնքան ձայն են տալու»,-ասել է Աշոտ Աղաբաբյանը:
Հարցին, որ եթե մեծամասնականից անցում լինի համամասնականի, ինքը նույնչափ շահագրռված կլինի՞ քվեներ հավաքելու հարցում, ասել է. «Նախ ես իմ կուսակցության համար եմ ձայներ հավաքում, ապա՝ իմ համար: Իմ ընտրողները իմ միջոցով են ընտրում իմ կուսակցությանը, հիմա եթե ես չառաջադրվեմ ու քարոզչություն անեմ, իրենք կընտրեն իմ կուսակցությանը: Ես ունեմ պատգամավորական գրասենյակ, մոտ 9 հոգի աշխատում են, ամբողջ ընտրատարածքի խնդիրներից տեղյակ են, ով պրոբլեմ ունեցել է, իր կողքն են եղել, աշխատել են անձայն, ես չեմ կարծում, որ պատգամավորները պիտի ընտրվեն միայն մեկ ընտրակարգով, երկուսն էլ պիտի լինի»:
Հարցին, իր համար միեւնո՞ւյն է համամասնական ընտրակարգին անցումը, պատասխանել է. «Ինձ համար միեւնույն է, իմ կուսակցությունը իր քաղաքական ծրագիրը որ ուղղությամբ տանում է, ես դրա կողմն եմ»: