Ձուլման նպատակով ոսկերչական իրերի գնումը հարկային հաշվառման բարդություններ է ստեղծում: Այս մասին նոյեմբերի 21-ին ՀՀ էկոնոմիկայի նախարարի հետ հանդիպմանը հայտարարել են ոսկերիչները:
«Երեւանի ոսկերչական գործարան» ԲԲԸ-ի փոխտնօրեն Աբգար Մկրտչյանը նշել է, որ ոչ բոլոր քաղաքացիներն են համաձայնում պաշտոնական պայմանագրեր կնքել՝ անձնագրային տվյալներով: Այդ դեպքում ոսկերչական ընկերությունը ստիպված միակողմանի հաշիվ-ապրանքագիր է կազմում եւ 11% եկամտահարկ վճարում: Այդ 11%-ը ստիպված վճարում է գործարանը, ինչը ֆինանսական բարդություններ է ստեղծում, հավելել է Մկրտչյանը:
Համանման խնդիր է մատնանշել նաեւ «Լեւանդ» ԲԲԸ-ի սեփականատերը, որը զարդատուփեր է արտադրում:
«Մենք թանկ փայտանյութ ենք օգտագործում, որը հայկական պայմաններում գնում ենք միայն մասնավոր անձանցից, ուրիշ էլ մարդ չկա: Մենք եւս նրանց հետ այդկերպ ենք աշխատում»,- ասել է ընկերության տնօրեն Հակոբ Դարբինյանը: