Սյունիքի մարզպետի պաշտոնից ազատված եւ Ջրային տնտեսության պետական կոմիտեի ղեկավար Վահե Հակոբյանի աշխատանքից ազատվելու պատճառը ոլորտի բարդությունն է, ինչից էլ նա «դիսկոմֆորտ» էր զգում: Այս մասին հայտնեցին NEWS.am-ի աղբյուրները:
Ջրային տնտեսության կոմիտեի ղեկավար նշանակելվելուց հետո Վահե Հակոբյանն ամեն րոպե ցանկանում էր հրաժարականի դիմում ներկայացնել, չունենալով փորձ այդ ոլորտում, չտիրապետելով իրավիճակին՝ չէր հարմարվում նոր աշխատանքին: Ավելին, նախկին մարզպետը մեծ երանությամբ էր հիշում պատգամավոր եղած տարիները: Իսկ այժմ նորից խորհրդարան վերադառնալու հավանականությունը փոքր է, տարբերակներից մեկն այն է, որ սյունեցի պատգամավորներից մեկին պաշտոն տան, կամ հրաժարվի մանդատից, նշանակվեն նոր ընտրություններ եւ նա առաջադրվի:
Ինչ վերաբերում է Վահե Հակոբյանի՝ նոր աշխատանքի անցնելուն, առայժմ դրա մասին խոսակցություններ չկան: Զանգեզուրի պղնձամոլիբդենային կոմբինատի նախկին տնօրեն Մաքսիմ Հակոբյանի որդին կզբաղվի իր բիզնեսներով:
Ի դեպ, ինչպես միշտ, Վահե Հակոբյանի պաշտոնանկության պատճառների եւ նրա ապագայի մասին ունեցած տեղեկությունները հնարավոր չէ ճշտել անձամբ հասցեատիրոջից: Նրա հեռախոսահամարները կամ անհասանելի են, կամ էլ չի պատասխանում զանգերին:
Ավելի վաղ NEWS.am-ը հայտնել էր, որ Սյունիքի նախկին մարզպետ Վահե Հակոբյանն, այսօր՝ նոյեմբերի 21-ին, իր դիմումի համաձայն, վարչապետի որոշմամբ ազատվել է ՀՀ տարածքային կառավարման նախարարության Ջրային տնտեսության պետի պաշտոնից: Նրա փոխարեն պաշտոնակատար է նշանակվել կոմիտեի պետի տեղակալ Գագիկ Խաչատրյանը:
Հիշեցնենք, որ Վահե Հակոբյանը Զանգեզուրի պղնձամոլիբդենային կոմբինատի նախկին տնօրեն Մաքսիմ Հակոբյանի որդին է: Նա պատգամավորի մանդատից հրաժարական տվեց եւ 2013թ հուլիսի 10-ին նշանակվեց Սյունիքի մարզպետ: Այդ պաշտոնից նա ազատվեց 2014թ սեպտեմբերի 4-ին:
