Երեւանի ավագանու «Բարեւ Երեւան» խմբակցության անդամ Դավիթ Սանասարյանը այսօր՝ նոյեմբերի 22-ին, վեց օր անց դադարեցրեց ԵԱՀԿ շենքի դիմաց հացադուլը ՝ նշելով, որ խոնարհվում է Արցախում խոցված ուղղաթիռի օդաչուների դիերը տարհանած հատուկ ջոկատայինների առջեւ:
«Չեմ ուրախանում, որ տղաների դիերը վերադարձվել են, քանի որ ուրախալու բան չկա: Ուզում եմ խնդրել, որ Դավիթ Սանասարյանին չգովաբանեք, չհերոսացնեք: Հերոսները ընկած են, կամ իրենց գործողության արդյունքում տղաներին հետ բերեցին: Խոնարհվում եմ նրանց առաջ որպես նախկին հետախույզ, եւ կարծում եմ, որ նրանք ցույց տվեցին, որ հայոց բանակը ուժեղ է, պինդ է, եւ հավերժ է, հայ ժողովրդի մեջքին կանգնած: Հավերժ փառք մեր ընկածներին եւ ուժ ու կորով մեր հետախույզներին ու մեր զինվորներին»,- լրագրողներին ասաց Դավիթ Սանասարյանը:
Ժառանգականը նշեց, որ օդաչուների դիերի վերադարձման գործում իր հացադուլը ոչ մի նշանակություն չի ունեցել:
«Ես այսեղ զրո մասնակցություն ունեմ: Ես այստեղ էի առաջին հերթին, որպեսզի պատերազմ չլինի, որպեսզի կարողանանք տղաներին առանց որեւէ խնդրի դուրս բերել այդտեղից, եւ իմ կոչը միջազգային կառույցներին է ուղղված, որպեսզի իրենց գործողությամբ թույլ չտան պատերազմ լինի, բայց նրանք ցույց տվեցին, որ բավականին ուշացած քայլեր են կատարում եւ որեւիցե լուրջ արդյունք չունեցան»,- նշեց Դավիթ Սանասարյանը:
Սանասարյանը նաեւ շնորհավորեց հայ ժողովրդին Լեոնիդ Ազգալդյանի ծննդյան 72-ամյակի կապակցությամբ՝ նշելով, որ հացադուլի վայրից այցելելու է նրա հուշակոթող, ապա նոր միայն տուն:
Դավիթ Սանասարյանը նաեւ շնորհակալություն հայտնեց «Շտապօգնությանը» իր հացադուլի ժամանակ բարեխիղճ ծառայություն մատուցելու համար, իսկ ոստիկանությանը՝ հերթապահության համար։
Սանասարյանը նշեց, որ մասնակցելու եմ տղաների հոգեհանգստին, եւ կոչ բոլորին հետեւել իր օրինակին։ Նշենք, որ Սանասարյանը շատ հուզված էր, խոսելիս մի քանի անգամ արտասվեց։