Տրվելով Բաքվի ճնշումներին՝ ԵԱՀԿ ՄԽ համանախագահները իրենց երկիմաստ դրության մեջ են գցել։ Այս մասին ասաց ռազմական փորձագետ Արկադի Գրիգորյանը՝ NEWS.am-ի թղթակցի խնդրանքով մեկնաբանելով համանախագահների աննախադեպ քայլը՝ նոյեմբերի 19-ի հայտարարության տեքստի փոփոխումը։
Հիշեցնենք, որ նախնական տարբերակում նշվել էր, որ «ուղղաթիռն ընկել է չեզոք տարածքում»։ Սակայն այս հայտարարությունից հետո ամերիկացի համանախագահ Ջեյմս Ուորլիքը որոշել էր հանրությանն ուրախացնել սոցցանցում հերթական գրառմամբ։ Ըստ միջնորդի՝ կողմերին զատում է որոշակի «ոչ մեկին չպատկանող տարածություն»։ Այսպիսով, համանախագահների պաշտոնական հայտարարությանը հաջորդած Բաքվի հիստերիայից հետո միջնորդները արագ, ընդ որում՝ հետին թվով, փոփոխել էին սեփական հայտարարության ձեւակերպումները՝ տարածքները «չեզոքից»՝ ««ոչ մեկին չպատկանող» դարձնելով։
«Միջնորդների զիջումները Բաքվի հանդեպ նրանց երկիմաստ դրության մեջ են գցում։ Թեպետ Բաքուն ինքը, հիստերիկություն անելով եւ ձեւակերպումների փոփոխման հասնելով, իրականում բացասական արդյունքի հասավ», - կարծում է փորձագետը։
Արկադի Գրիգորյանի կարծիքով՝ Ադրբեջանի նման վարքը նրան մեկուսացած դիրքում է դնում։ «Ինչ վերաբերում է համանախագահներին, ապա ադրբեջանական լակոտին երես տալը, նրա կամակորություններով շարժվելը ոչ մի լավ բան չի խոստանում», - ամփոփել է Արկադի Գրիգորյանը։