Նոյեմբերի 10-12-ին Բելգրադում անցկացվեց Casual Connect համակարգչային խաղերի համաժողովը եւ նրանց կից IndiePrize «ինդի» խաղեր նախագծողների մրցույթ- ցուցադրությունը, որին մասնակցեց նաեւ «Բաց Խաղ» առաջնության կազմակերպիչ Ինֆորմացիոն տեխնոլոգիաների Ձեռնարկությունների միությունը՝ ի դեմս առաջնության ղեկավար Շուշանիկ Վարդանյանի եւ առաջնության հաղթող մասնակից Հենրիկ Հակոբյանի՝ Choppy Fish խաղով: Խաղը ներկայացվեց նաեւ InDiePrize մրցույթ- ցուցադրությանը: Համաժողովը լի էր թեմատիկ դասընթացներով, գործարար ներկայացումներով եւ հաջողության պատմություններով, որի մասնակցությունը մեծ փորձ էր մասնակիցների համար:

Մրցույթի ժյուրի անդամների եւ  ներկա ընկերությունների կողմից մեծ էր հետաքրքրությունը Հայսատնից ներկայացված Choppy Fish խաղի նկատմամբ, որը գրավեց ներկաների ուշադրությունը իր գրաֆիկական լուծումներով  եւ ավարտուն տեսքով: Ընդհանուր առմամբ չեր զիջում ներկայացված մասնակիցների խաղերին:

Ըստ 18 ամյա Հենրիկ Հակոբյանի համաժողովի եւ մրցույթի մասնակցությունը տվեց իրեն նոր կապեր ոլորտի ընկերությունների հետ, որոնց առաջարկների եւ խորհուրդների հիման վրա հետագայում կկատարի որոշ փոփոխություններ ներկայացված խաղում: Խաղի զարգացման եւ հրատարակման համար Հենրիկին եղան նաեւ մի շարք առաջարկներ՝ առաջատար ընկերությունների կողմից:

Ըստ Շուշանիկ Վարդանյանի համաժողովի եւ մրցույթի մասնակցությունը պետք է դարձնել շարունակական, ինչը հնարավորություն կտա հայ երիտասարդներին ծանոթանալու միջազգային փորձին, ցուցադրելու իրենց աշխատանքը եւ մտքերը, հաստատելու ընկերական եւ գործընկերային հարաբերություններ ոլորտի ընկերություների եւ անհատների հետ:

Համաժողովին ձեռք բերած կապերը մեծ հնարավորություններ կստեղծեն զարգացնելու «Բաց Խաղ» առաջնությունը, դարձնելու այն միջազգային: Առաջնության շրջանակներում կազմակերպելու դասընթացներ եւ հանդիպումներ առաջատար ընկերությունների մասնագետների հետ:

Շ. Վարդանյանը եզրափակելով նշեց, որ արդեն իսկ 2015 թվականին ակնկալում են հայ երիտասարդների ակիվ մասնակցությունը «Բաց Խաղ» համակարգչային եւ բջջային խաղերի առաջնությանը, որ խոստանում է ավելի մեծ միջազգային հնարավորություններ եւ կապեր ստեղծելու հնարավորություն: