Վանաձորում մայիսի 31-ին դաժանի ծեծի ենթարկված՝ «Վանաձոր» առողջարանի պահակ, 58-ամյա Լյովա Բուլղադարյանի գործով դատավարությունն արդեն 2-րդ անգամ հետաձգվում է:
NEWS.am-ի թղթակցի հետ զրույցում տուժողի կինը՝ Նվարդ Բուլղադարյանը, հայտնեց, որ իրենք որեւէ բողոք չունեն, պարզապես ցանկանում են, որ իր ամուսնու բուժման ծախսերը հոգան:
«Ամուսինս հաշմանդամ է դարձել, չի խոսում, չի քայլում, նրան երկարատեւ բուժում է հարկավոր, սակայն մենք միջոցներ չունենք: Իբր թե թոշակավորել են, ամսական 13,800 դրամ է ստանում, բայց դե ի՞նչ կարող է անել: Մենք էդ Բենիկի ծնողներին էլ ենք ասել, որ իրենցից բողոք չունենք, մեզ պետք է ընդամենը որ ծախսերը հոգան»,- ասաց նա:
Տիկին Նվարդի խոսքով՝ գործով ամբաստանյալ Բենիկ Ալեքսանյանի հարազատները սկզբում օգնել են, հոգացել են հիվանդանոցի ծախսերը, խոստացել են հետագայում էլ օգնել. «Բայց հիմա էլ չեն օգնում: Մենք էլ այսօր դատարան դիմում ենք ներկայացրել, որ մեզ միայն նյութական փոխհատուցում է հարկավոր, այսինքն քրեական որեւէ պահանջ չունենք»:
Նշենք, որ գործը քննվում է Լոռու մարզի ընդհանուր իրավասության դատարանում: Բենիկ Ալեքսանյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով, այն է՝ դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը: Նա գրավի դիմաց ազատ է արձակվել
Ավելի վաղ NEWS.am-ը հայտնել էր, որ արնաշաղախ պահակին առավոտյան 06։30-ի սահմանում նկատել է առողջարանի տարածքում վազող մի աղջիկ եւ ահազանգել ոստիկանություն։ Լյովա Բուլղադարյանը մի քանի ժամ մնացել էր պահակակետի մոտ գետնին ընկած, նա մեծ քանակությամբ արյուն էր կորցրել։ Գործով կալանավորվել է 24-ամյա Բենիկ Սամվելի Ալեքսանյանը: